Taldyqorǵanda 180 adamnyń AÁK-ke qujattary qabyldanbady

TALDYQORǴAN.QazAqparat – Taldyqorǵan qalasy boıynsha 1571 adamǵa ataýly áleýmettik kómek taǵaıyndaldy. Al qujattaryn dál osy kómekke ótkizgen 180 adamdiki qabyldanbady, dep habarlaıdy QazAqparat tilshisi.

Bul jaıtqa olardyń aılyq tabysynyń joǵary bolýy nemese bastarynda birneshe jeke múlikteri bar bolýy syndy túrli jaıttar sebep boldy.

«Byltyr Taldyqorǵan qalasy boıynsha 5632 adam ataýly áleýmettik kómekti aldy. Al bıyl 1571 adamǵa osy kómek taǵaıyndaldy. Bul adamdardyń sany jyl sońyna deıin taǵy ósýi múmkin», - dedi Taldyqorǵan qalalyq jumyspen qamtý ortalyǵynyń dırektory Gúlmıra Esjanova.

Sondaı-aq, bıyldan bastap AÁK byltyrǵydaı 7 jasqa deıingi bala kútimimen otyrǵan analarǵa berilmeıdi. Jańa zańǵa sáıkes, endi analar balalary 3 jasqa tolǵannan keıin jumysqa shyǵýy tıis.

«Bala úsh jasqa tolǵan kúnnen bastap, anasy turaqty jumyspen qamtylýy kerek. Sodan keıin ǵana ataýly áleýmettik kómekke júgine alady. Tabys kózi kedeılik sheginiń 70 paıyzy arasyndaǵy aıyrmashylyq ǵana beriledi», - dedi G.Esjanova.

Al buǵan deıin bala kútimimen otyrǵan analarǵa jumyspen qamtý ortalyǵy túrli jumystardy usynyp jatqandaryn aıtady.