Taldyqorǵanda 100-ge jýyq otbasyna páter kiltteri tabystaldy

TALDYQORǴAN. QazAqparat – Astana kúnine oraı, Taldyqorǵanda 98 páterli úı paıdalanýǵa berildi, dep habarlaıdy QazAqparat Jetisý oblysy ákiminiń baspasóz qyzmetine silteme jasap.

Astananyń 25 jyldyq mereıtoıy qarasańynda Taldyqorǵan qalasyndaǵy «Birlik» shaǵynaýdanynda «Nurly jer» baǵdarlamasy boıynsha salynǵan 5, 7, 9 qabatty turǵyn úı paıdalanýǵa berildi.

«Taldyqorǵan qalasynda 15 myń adam úı kezeginde tur. Endigi bizdiń mindetimiz – kezekte turǵandardyń sanyn eki ese qysqartý. Ol úshin jylyna keminde 1500-2000 sharshy metr úı berýimiz kerek. Osyǵan deıin kezekke baılanysty túsinbeýishilik, zańsyzdyqtar boldy. Turǵyndar kezegin tsıfrlyq júıege kóshirdik. Endi kez kelgen adam óz kezegin úıinde otyryp-aq baqylaı alady. Qýanyshtaryńyz uzaqqa sozylsyn. Osy úıde ónip-ósip, baqytty ǵumyr keshińizder!» - dedi oblys ákimi Beıbit Isabaev kilt tabystaý saltanatynda.

Bul úıdiń qurylysy 2020 jyly bastalǵan bolatyn. 98 páterdiń 42-si – 1 bólmeli, 28-i – 2 bólmeli, 28-i – úsh bólmeli páter.

Aıta ketsek, Taldyqorǵan qalasynda jyl basynan beri 280 adam baspanaly boldy. Endi jyl sońyna deıin taǵy 1 700 adam úı alady. Nátıjesinde 51 úı paıdanýǵa beriledi. Olardyń basym bóligi kópbalaly otbasylar, ata-ana qamqorlyǵynsyz qalǵandar, ardagerler men І, ІІ top múgedekteri.

Eske salsaq, Taldyqorǵanda 13 adamǵa ońaı jolmen páter alýǵa ýáde berip, jábirlenýshilerdiń 18 mln teńgesin ıemdengen 2 adam sottaldy.