Taldyqorǵan turǵyny páterin esirtki jasaıtyn fıtozerthanaǵa aınaldyrǵan
Páterdiń ıesi 34 jastaǵy er adam bolyp shyqty. Ol jatyn bólmesin esirtki jasaýǵa arnalǵan fıtolaboratorııa retinde jabdyqtap, arnaıy jaryq shamdarynyń astynda baqsha qumyralaryna 10 túp marıhýana otyrǵyzǵan.
«Zerthana kópqabatty úıdiń ekinshi qabatynda ornalasqan. Kúdikti er adam buryn jaýapqa tartylmaǵan. Qazirgi kezde ósirýge tyıym salynǵan ósimdikterdi zańsyz ósirý faktisi boıynsha qylmystyq tergeý amaldary bastaldy. Ustalǵan adamǵa qatysty kelý mindettemesi túrinde bultartpaý sharasy tańdaldy», - dedi Jetisý oblysy PD Esirtki bıznesine qarsy is-qımyl basqarmasy bastyǵynyń orynbasary Aıan Isabekov.
Páterdiń taǵy bir bólmesin tintý kezinde tártip saqshylary belgisiz sańyraýqulaqtardy tapty. Sańyraýqulaqtar tárkilenip, olardyń quramynda esirtki baryn anyqtaý úshin saraptamaǵa jiberildi.
Aıta ketsek, jyl basynan beri óńirde quramynda esirtki bar ósimdikterdi ósirýdiń 10 faktisi tirkeldi. 20-dan astam esirtki satýshy jaýapqa tartyldy. Zańsyz aınalymnan 40 kelige jýyq túrli esirtki tárkilendi.
Foto: polisia.kz