«Taldyqorǵan - Óskemen» avtojoly 2021 jyly tolyq paıdalanýǵa beriledi

ÓSKEMEN. QazAqparat - Respýblıkalyq mańyzy bar «Taldyqorǵan - Qalbataý - Óskemen» avtojolyn qaıta jańartýdy tolyq aıaqtaý 2021 jylǵa josparlanyp otyr, dep habarlaıdy QazAqparat «QazAvtoJol» kompanııasyna silteme jasap.

Qazirgi ýaqytta Taldyqorǵan qalasynan Óskemenge deıin uzyndyǵy 313,5 km quraıtyn avtojoldy qaıta jańartý jumystary júrgizilýde. Bas merdiger CITIC Construction Co, LTD kompanııasy.

«Búginde jolshylar aınalma joldardy salyp jatyr. Negizgi kólik jolynyń ósimdik ósken topyraq qabatyn alý, eski jol jabyndysyn frezerleý jumystary bastaldy, sý ótkizgish qubyrlary ornatylýda. Budan basqa qum, bıtým jáne temir beton buıymdary daıyndalýda», delingen habarlamada.

Kompanııanyń málimetinge, qaıta jańartýdan keıin avtomobıl jolynyń 31 shaqyrymy I-shi «b» sanatyna, al qalǵan 282 shaqyrymy ІІ sanatqa keltiriledi. Bul ýchaskede eki deńgeıli qos jol aıryǵy salynady, 21 kópir men 404 sý ótkizý qubyry qaıta jańartylady.

Atalǵan avtojol ýchaskesi Almaty oblysy Alakól kóliniń týrıstik klasterine engen. Byltyr joldyń osy bóligimen 1,2 mln otandyq jáne sheteldik týrıst ótken. Bıyl 1,5-1,8 mln týrıst júredi dep kútilýde.

Eske sala ketsek, QR Prezıdenti Q.Toqaev Shyǵys Qazaqstan jáne Almaty oblystaryna sapary barysynda jergilikti avtojoldardyń sapasynyń syn kótermeıtinin jáne Alakóldegi týrıstik servısti jaqsartý týraly aıtqan edi.
«Osyǵan oraı, Úkimetke jáne eki óńirdiń ákimderine qysqa merzimde keshendi sharalar uıymdastyrýǵa tapsyrma bergen bolatyn. Quzyrly mekemeler Prezıdenttiń osy syndarynan qorytyndy shyǵarady dep oılaımyz. Bul Memleket basshysynyń tikeleı baqylaýynda», - dep jazdy Berik Ýálı.