«Taldyqorǵan - Qalbataý - Óskemen» tasjolyna jóndeý júrgizilmek

ASTANA. QazAqparat – Respýblıkalyq mańyzy bar «Taldyqorǵan - Qalbataý - Óskemen» tasjolyna jóndeý júrgiziledi. Osyǵan baılanysty Jetisý oblysy ákimdiginiń teńgerimindegi Úıgentas orman sharýashylyǵynyń jeri ýaqytsha Avtomobıl joldary komıtetine berilmek. Tıisti qaýlyǵa Premer-Mınıstr Álıhan Smaıylov qol qoıdy, dep habarlaıdy QazAqparat tilshisi.

«Osy qaýlynyń qosymshasyna sáıkes, Jetisý oblysynyń tabıǵı resýrstar jáne tabıǵatty paıdalanýdy retteý basqarmasy Úıgentas orman sharýashylyǵy memlekettik mekemesiniń orman qory jerleri sanatynan jalpy aýdany 3,7934 gektar jer ýchaskeleri ónerkásip, kólik, baılanys, ǵarysh qyzmeti, qorǵanys, ulttyq qaýipsizdik muqtajyna arnalǵan jerler jáne aýyl sharýashylyǵyna arnalmaǵan ózge de jerler sanatyna aýystyrylsyn. Jetisý oblysynyń ákimi QR zańnamasynda belgilengen tártippen kórsetilgen jer ýchaskeleriniń «Taldyqorǵan - Qalbataý - Óskemen» respýblıkalyq mańyzy bar avtomobıl jolynyń 480-515 km ýchaskesin rekonstrýktsııalaý (salý) úshin Indýstrııa jáne ınfraqurylymdyq damý mınıstrliginiń Avtomobıl joldary komıtetine berilýin qamtamasyz etsin», - delingen Álıhan Smaıylov qol qoıǵan Úkimet qaýlysynda.

Qujatta kórsetilgendeı, quzyrly orǵan joldy jóndeý kezinde orman alqabyna kelgen zalaldy memleket esebine óteıdi jáne ol aýmaqty tazartýǵa mindetteledi.

Qaýly alǵash jarııalanǵan kúnnen, ıaǵnı 16 tamyzdan bastap qoldanysqa engizildi.