Taldyqorǵan qalasynyń bas jospary ózgertiledi
Taldyqorǵanda qazir 200 myńnan astam adam turady. Qoldanystaǵy bas jospar 2017 jyly halyq sany 156 myń bolǵan kezde bekitilgen.
Jalpy, qalada eki turǵyn aýdannyń – Qaratal ózeniniń oń jaǵalaýy men Ońtústik-batys turǵyn aýdanynyń 2-kezeńiniń damýyna qaraı halyq sany óse túsedi degen boljam bar.
Taldyqorǵan qalasy ákimdiginiń málimetinshe, qalany damytý barysynda Qaratal ózeniniń oń jaǵalaýynda 174 ga aýmaqqa 85 úı, 2 mektep, 6 balabaqsha jáne 1 ońaltý ortalyǵyn salý kózdelgen. Qazirgi kezde boljaldy quny 14,5 mlrd teńge bolatyn 1 350 páterlik 28 úı jobalanyp jatyr. Memlekettik saraptama nátıjeleri tamyz aıynda shyǵýy tıis, al jobalardy iske asyrý 2024-2025 jyldarǵa josparlanǵan.
Aýdany 104,5 ga bolatyn Ońtústik-batys turǵyn aýdanynda 73 jańa úı, 2 mektep, 2 balabaqsha men 2 emhana salý josparda bar. Aldyn ala esepteýler boıynsha quny 13,5 mlrd teńge bolatyn 1 215 páterge arnalǵan 26 úı jobalana bastady. Qurylys jumystary 2023-2024 jyldary júrgiziledi. Sondaı-aq, qýattylyǵy saǵatyna 49 Gkal bolatyn, 15 myń adamdy qamtıtyn qazandyq salý jobalanyp otyr. Qurylystyń boljaldy quny – 7 mlrd teńge, saraptama nátıjeleri osy jyldyń maýsym aıynda alynady.
Injenerlik ınfraqurylymdy damytý boıynsha qala kósheleri uzara túspek. Ońtústik-batys turǵyn aýdanyn damytýdyń 1-kezeńinde quny 3 mlrd teńge bolatyn, uzyndyǵy 5,5 shaqyrymdyq 9 kóshe salý kózdelgen. 2021-2022 jyldary 2,4 km nemese 4 kóshe salynsa, bıyl 2 kóshe nemese 1 km jol salý josparlanǵan. Joba 2024 jyly aıaqtalýy tıis.
Jalpy, qalada jol ınfraqurylymyna qatysty jalpy quny 15,1 mlrd teńge bolatyn 7 joba iske asyrylady, ıaǵnı uzyndyǵy 103 km kóshe qamtylady. Sonyń ishinde 3 joba 2021 jyly bastalǵan, olar 2024 jyly aıaqtalady, sondaı-aq 4 joba kúrdeli jóndeýge qatysty, búgingi kúni merdigerdi anyqtaý konkýrstyq rásimderi júrip jatyr.
Osy jyly jańadan 18,3 km bolatyn 34 kóshe salyp, 104 kósheniń 46,3 shaqyrymyna kúrdeli jáne ortasha jóndeý jasaý josparlanǵan. Jańa qurylystar «Jastar-1», «Soltústik-batys» jáne 8, 9-shaǵyn aýdandarda, al jóndeý jumystary «Ońtústik-shyǵys» jáne «Shyǵys» turǵyn aýdandarynda, Ótenaı men Eńbek aýyldarynda josparlanǵan. Oǵan qosa, «Shaıqorǵan», «Jastar-2», 3-bólimshe, Kóktal aýyly men «Plodopıtomnık» turǵyn aýdandarynda da birqatar joba qolǵa alynady.
Gazdandyrý jumystary da jalǵasady. 2016 jyldan bastap Taldyqorǵanda 921,5 km jeli salynǵan, halyqtyń 90,3%-y kógildir otynǵa qosylýǵa múmkindik alyp, 57,3%-y gaz qostyrdy. 2022 jyldan beri «Jastar-2» jáne Yntymaq turǵyn úı aýdanyndaǵy 3 myńǵa jýyq úıdi qamtıtyn 2 joba iske asyrylyp jatyr.
Bıyl 2 nysannyń qurylysy bastalady. Atap aıtqanda, qalanyń qalǵan ýchaskelerinde jáne Moınaq aýylynda jeliler tartylady. Tabıǵı gazben áli qamtylmaǵan 4 myńǵa jýyq ýchaske bar, olar: Qaratal, Qyzyl tas, Merekelik, Balyqty, Sarybulaq, Almaly, Aşybulaq saıajaı qaýymdastyqtary. Bul ýchaskelerdi jobalaý osy júzege asýy tıis.
Oblys ortalyǵyn abattandyrý maqsatynda 2 jańa skver salý josparlanǵan.