Taldyqorǵan ákimdigi 26 mln teńgege 5 qoǵamdyq dárethana ornatty

TALDYQORǴAN. QazAqparat - Taldyqorǵan ákimdigi 26 mln teńgege 5 qoǵamdyq dárethana ornatty. Árqaısynyń baǵasy 5 mıllıon teńgeden asady, dep habarlaıdy QazAqparat tilshisi.

Taldyqorǵan qalalyq ákimdiginiń málimetinshe, qoǵamdyq dárethanalar áli iske qosylmaǵan.

«Ijenerlik ıaǵnı, jaryq, sý júıeleri tartylǵannan keıin paıdalanýǵa beriledi»,- delingen vedomstvonyń habarlamasynda.

Al dárethanalar ornatylǵan jer kezdeısoq tańdalmaǵan. Qala turǵyndaryna arnaıy saýal joldanyp, halyqtyń qalaýy boıynsha qoıylatyn oryndar anyqtalǵan.

Jalpy, ár qoǵamdyq nysan zamanaýı úlgide jasaqtalǵan. 11 sharshy metr aýmaqty qamtıdy. Sýdy jylytýǵa arnalǵan 25-50 lıtrlik boıler, arnaıy qoldy qurǵatatyn qurylǵy, qoqys jáshigi syndy qajetti dúnıeniń barlyǵy bar. Nysannyń aınalasyna beınebaqylaý kamerasy da ornatylǵan. Al qoǵamdyq dárethana aqyly nemese tegin qyzmet etetini ázirge belgisiz.