Taldykólge qoqıqazdar «qaıta oraldy»: Astana jastary kóldi qurǵatýǵa qarsy shyqty
«2019 jyldan beri Astananyń tabıǵı kórikti jerleriniń biri joıyla bastady. Kishi Taldykól — túrli ańdar, soǵan qosa Qyzyl kitapqa engen qyzǵylt qoqıqazdar mekendeıtin jer kópqabatty úı qurylysyna berildi. Turǵyn úı keshenderiniń qurylysy úshin ekojúıeniń joıylý qaýpi astanalyq qoǵamdyq belsendiler men ekologtardyń narazylyǵyn týdyrdy. Tipti Ekologııa mınıstrligi de qala josparyna qarsylyǵyn bildirgen bolatyn. Sheneýnikter kóldiń az bóligin saqtaýǵa jáne sýdyń aınalysynda «ekosaıabaq» quryp, qala turǵyndaryn qajetti demalys ınfraqurylymymen qamtamasyz etýge ýáde etken. Degenmen búgingi kúni kóldiń ornynda en dala qaldy. Qala bıligi ekologtar men mınıstrlikke jalǵan ýáde berip, kóldi tolyǵymen qurǵatty. Alaıda, tabıǵatty aldaý múmkin emes, qoqıqazdar Taldykóldiń ornynda qalǵan qurǵaq daladan ushyp ketken» deıdi belsendiler.
20 tamyzda qoqıqazdar qaıta oraldy. Jańa adamdar «Qoqıqazdar úıi» naýqanyn ótkizgen bolatyn.
Júzdegen belsendi qyzǵylt qus músinshesimen Taldykóldiń qurǵatylǵan túbinde júgirip, kóldiń aldyndaǵy Syǵanaq kóshesiniń boıyna 100 músinshe ornatty.
Osy sımvolıkalyq kórsetilim «Qoqıqazdar úıi» atty bannermen bezendirildi.
«Qoqıqazdar úıi» ınstallıatsııasy uzaq turmady. Polıtsııa qyzmetkerleri barlyq fıgýralar men bannerdi dereý alyp tastady.
«Oryndalmaǵan ýádelerdi eske alýǵa qala bıligi qulshynys tanytpaıtyny belgili. Jyldar boıy biz bılikke aldanyp keldik. Buny toqtatatyn ýaqyt keldi. Halyqtyń pikirin tyńdaı bilý kerek. Qurǵatylǵan Kishi Taldykól — bul halyq álsizdiginiń, sybaılas jemqorlyǵynyń eskertkishi» deıdi «Jańa adamdar».
«Budan bulaı biz sizderdiń sózińizge senbeımiz. Biz endi ózimizdi aldap, osylaı «laqtyryp ketýge» jol bermeımiz. Ótirik soǵyp júrgen jemqorlar men arsyz qurylysshylar, tyńdańdar! Biz, qazaqstandyqtar, Astana turǵyndary, Jańa adamdar belsendileri — úıimizdiń qıralýyna jol bermeımiz. Sizderge kóldi qaıtarýǵa keńes beremiz, bárine durys sheshim osy», - dep atap ótti qozǵalys belsendisi Baýyrjan Amanov.