Taldyqorǵandyq stýdenttiń jumbaq óliminiń syry jeti aı ótse de áli ashylmady

<p>TALDYQORǴAN. KAZINFORM - Jetisý oblysynda jataqhanada jumbaq jaǵdaıda qaıtys bolǵan stýdent qyzdyń týystary tergeýdiń sozylyp ketkenine narazy. 16 jastaǵy Zarına Berikova 28 aqpan kúni Taldyqorǵan qalasyndaǵy &laquo;Jiger&raquo; jataqhanasynda aıaqasty &nbsp;qaıtys bolǵan. Sodan beri 7 aı ótse de, &nbsp;qylmystyq is áli sotqa jetpegen.</p>

Eskeldi aýdanynyń turǵyny Zarına Berikova 9-synyptan keıin Taldyqorǵan qalasyndaǵy ınnovatsııalyq kolledjge túsedi. Muǵalim bolýdy armandaǵan boıjetken nebary 6 aı ǵana oqyp, belgisiz jaǵdaıda kóz jumǵan.

«Mine 7 aı boldy, maǵan áli jumbaq neden qaıtys bolǵany. Bir aqıqaty bolý kerek qoı. Osy ýaqytqa deıin bir sheti shyǵý kerek edi, is tergelip jatyr deıdi neshe aıdyń júzi boldy. Esikterin qaǵyp baramyz, eshqandaı áli aqıqat joq», - deıdi Zarınanyń anasy Jazıra Toǵasbaeva.

Anasynyń aıtýynsha, Zarına jataqhanada komendanttyń bólmesinde kóz jumǵan. Al onda ne bolǵany ázirge beımálim. Bilim ordasyndaǵylar aıaqasty talyp qaldy degendi aıtqan. Biraq týystary Zarınanyń eshbir syrqaty joq ekenin, tipti ýaıymy da bolmaǵanyn aıtady. Olar beınekameradan boıjetkenniń sol bólmege óz aıaǵymen kirip, keri shyqpaǵanyn jetkizdi.

«Bala óz aıaǵymen 20:04- te ol bólmege kirip tur negizi. Sol aralyqta eki jedel járdem kelgen. Qyzymyzǵa eshqandaı alǵashqy kómek kórsetilmegen. Birinshi ekspertızada noshpadan ýlanǵan dep kórsetip berdi. Oǵan bizdiń kúmánimiz bar. Eger kóp mólsherde ishetin bolsa asqazanynan tabylýy kerek edi. Jýyndyrýǵa ózim kirdim. Sol kezde baıqadym oń jaq kózi jáne astyńǵy erni ishinen jyrylyp, kógerip qalǵan. Ony birinshi ekspertızada da kórsetip bergen bizge. Qatty zattan paıda bolǵan travma dep. Ony birinshi ekspertızada da kórsetip bergen», - deıdi týysy Aıym Jıynbek.

Sondaı-aq marqumnyń týystary tergeýdiń ádil ótip jatqanyna kúmánmen qaraıdy. Olardyń sózinshe, bastapqy iste tirkelgen jataqhanadaǵy beınejazba búginde joq. Qyzdyń telefonyndaǵy sms-hattar óshirilgen. Zarına Berikovanyń týystary qaıta medıtsınalyq saraptama taǵaıyndap, sol kúni qyzdyń janynda bolǵan adamdardy tergeýdi suraıdy.

Eske sala keteıik buǵan deıin Taldyqorǵanda 17 jastaǵy stýdent qyzdyń kolledjdiń 3 qabatynan qulap, qaıtys bolǵanyn jazǵan bolatynbyz.