Taldyqorǵandyq oqýshylardyń tárbıesimen mentorlar aınalysady

<p>Jetisý oblysynda júzege asyrylǵan oqýshylardy adamgershilik-quqyqtyq tárbıeleý jónindegi pılottyq joba Taldyqorǵan qalasynyń 30 mektebin qamtyp otyr, dep habarlaıdy <a href="Kazinform" target="_blank" rel="noopener">Kazinform</a>.</p>

Jobanyń negizgi maqsaty – oqýshylardyń jeke tulǵa retinde damýyn jáne olardy áleýmettendirýdi mentorlyq súıemeldeý arqyly óńirde biryńǵaı tárbıe keńistigin qalyptastyrý.

«Adamgershilik-quqyqtyq jumys jónindegi mentor» jobalyq keńsesi oblystyq qoǵamdyq damý basqarmasynyń bazasynda qurylǵan. Basqarmanyń málimetine qaraǵanda, oblys ortalyǵynyń árbir mektebinde pedagogıka, psıhologııa, quqyq salasynda bilimi bar, sondaı-aq biliktilik talaptaryna sáıkes keletin, arnaıy oqý kýrsynan ótken mamandar mentorlyq qyzmetti júzege asyrady. Ár mektepte 1 mamannan, barlyǵy 30 adam jumys isteıdi.

«Qazirgi ýaqytta qalalyq mektepterdiń oqýshylary mentor mamannyń kim ekenin, oǵan senýge jáne ózin alańdatqan máselelerin aıtyp, oı bólisýine bolatynyn biledi. Mentor keńes beredi, baǵyttaıdy, máseleni sheshý joldaryn usynady, qajet bolǵan jaǵdaıda ártúrli qyzmet salalarynyń mamandaryn tartady. Osylaısha, mentorlar mektep, ata-ana, jalpy qoǵam men balalar arasynda erekshe kópir bolyp otyr»,- deıdi «Adamgershilik-quqyqtyq jumys jónindegi mentor» jobalyq keńsesiniń jumysyna jetekshilik etetin oblystyq qoǵamdyq damý basqarmasy basshysynyń orynbasary Іlııas Tústikbaev.

Onyń aıtýynsha, qazan aıynda mentorlardyń qatysýymen «Qaýipsizdik jáne quqyq buzýshylyqtyń aldyn alý» aılyǵy ótti, al qarasha aıynda «Bilim berý» aılyǵy ótedi dep josparlanyp otyr. Osyǵan baılanysty jelilik kestege sáıkes Taldyqorǵan qalasynyń oqýshylary men muǵalimderine Polıtsııa departamentiniń ekstremızmge qarsy kúres, esirtkige qarsy kúres bólimderiniń, Taldyqorǵan qalalyq №1 emhananyń jáne t.b. mamandarymen birlesip, dárister ótkiziledi.

Sonymen qatar shaqyrylǵan lektorlardyń qatysýymen arnaıy áńgimelesýler ótkizý josparlanǵan. Mysaly, joba engizile bastaǵannan bastap oqýshylarǵa QR Ǵylym jáne joǵary bilim mınıstri Saıasat Nurbektiń, oblys prokýrory Madııar Basshybaevtyń, «Ulttyq eriktiler jelisi» ZTB atqarýshy dırektory Tatıana Mıronıýktiń, dintanýshy, teolog, psıholog Nurlan Asanovtyń, «Qazaqstan stýdentter alıansy» respýblıkalyq stýdentter qozǵalysy» QB tóraǵasy Ulan Náýkenniń, shyǵystanýshy, «Otbasy hrestomatııasy» jobasynyń jetekshisi, «Qýyskeýde» kitabynyń avtory Sanjar Kerimbaıdyń dáristeri uıymdastyryldy.

Al 1-3 qarasha aralyǵynda 225 oqýshyǵa SDU, QBTÝ, QazUÝ, QazUPÝ, Narxoz, QazUMÝ jáne t. b. elimizdiń úzdik joǵary oqý oryndaryna kásibı baǵdarlaý ekskýrsııalary josparlanǵan.