Taldyqorǵandyq 2602 bala tegin úıirmege qatysyp júr
Qosymsha bilim berý balalardyń bos ýaqytynda mektepten alǵan bilim-tárbıesin tolyqtyryp, jetkinshekterdiń shyǵarmashylyq qabiletin arttyryp, rýhanı-áleýmettik, moraldyq turǵyda damýyna yqpal etedi.
«Oqýshylar saraıy 2016 jyly qoldanysqa berildi. Ǵımarat 3 qabatty, 5 bólikten turady. Úıirme jumystaryna arnalǵan 45 kabınet bar, 4 sheberlik, 8 zerthana, 3 kórme zaly, kontserttik, akt, májilis-zaly, medıateka, murajaı, jandy burysh, dybys jazý stýdııasy, juldyzdy zal jáne observatorııa jumys isteıdi», - deıdi Lázzat Esbolava.
Úıirmeler 8 baǵyt boıynsha jumys isteıdi. Atap aıtar bolsaq, sándik-qoldanbaly, lıngvıstıkalyq, kórkem-estetıkalyq, mýzykalyq, ǵylymı-tehnıkalyq, týrıstik,sporttyq jáne balalar qozǵalysy bar.
Ǵylymı-tehnıka damyǵan zamanda osy baǵyttaǵy úıirmege erekshe kóńil bólinedi. Munda ǵylymı zertteýlerge, tehnıka álemine baýlýǵa, ártúrli tehnıkalyq obektilerdi modeldeýge jáne qurastyrýǵa jáne tájirıbelik-eksperımenttik jumys júrgizýge úıretýge, tehnıkalyq ǵylymdar, kompıýterlik tehnologııalar salasynda bilim berýge, qajetti daǵdylardy úıretýge múmkindik beredi.
Tumsa tabıǵaty kózdiń jaýyn alatyn Jetisý óńirinde týrızm salasyn damytý oblystyń birden-bir ózekti máselesi. Sondyqtan jetkinshekterge týrızm- sport baǵytyndaǵy úıirmeler de bar. Ol taý týrızmi, jaıaý saıahattaý , órmeleý, týrıstik kópsaıys, qazyna izdeýshiler bólimderine bólinedi.
Oqý-tərbıe úderisin ınnovatsııalaý – búgingi kúnniń ózekti məselesi, muǵalimder jańa ádispen, jańa tehnologııany jıi paıdalanady. Qazirgi tehnologııada «mıǵa shabýyl», debat, modem, joba jasatý, qorǵatý, oqý, jazý arqyly oqýshylardyń synı kózqarasyn qalyptastyrý jıi qoldanylady.
«Jas akter» úıirmesine jetekshilik etetin QR Halyq ártisi Almahan Kenjebekova men Qazaqstannyń eńbek sińirgen qaıratkeri Kendebaı Temirbaıuly sahnaǵa jas jetkinshekterdi daıyndap, poetıkalyq qoıylymdar uıymdastyrady.
Ǵylymı-tehnıkalyq baǵytty damytý jáne ony IT-tehnologııanyń ártúrli salalarynda keńinen qoldaný maqsatynda «TECHNOPAPK», IT-synyp, Fab Lab ortalyqtary úlken jetistikterge jetken.
Dırektordyń aıtýynsha, bıyl Astana qalasynda ótken halyqaralyq Central Asia First Championship jarysyna «IT JET» komandasy dodaǵa túsip, 80 komanda arasynan úzdikterdin ishinen kórinip «INNOVATION PROJECT AWARD FINALIST» júldeli 2 oryndy ıelengen. Sondaı-aq Taraz qalasynda ótken tehnıkalyq shyǵarmashylyq jáne ónertapqyshtardyń (áýe, zymyran, kólik, keme qurastyrý) respýblıkalyq jarysyna qatysqan Nurasyl Sharıpov, Jánibek Tursynbekuly, Arslan Arkenov QR Oqý-aǵartý mınıstrliginiń arnaıy sertıfıkatymen marapattalǵan.
Budan bólek, «Solnyshko» ansambli halyqaralyq, respýblıkalyq baıqaýlarda júldeli oryndarǵa ıe bolyp júr. Atap aıtatyn bolsaq, Ispanııa, Italııa, Frantsııa, Túrkııa, Ózbekstan, Qyrǵyzstan memleketterinde ótken baıqaýda bas júldeni ıelendi.
«Murager» dombyrashylar ansambli de Chehııa memleketinde jeńiske jetip, bas júldeni jeńip aldy. Sankt –Peterbýrgte ótken sýper fınalǵa qatysyp, birden 2 oryndy ıelendi.
Sol sııaqty «Melodı Kıds» vokal stýdııasy, «Ýnıson», «Veselaıa kompanııa» úıirmeleri talaı márte halyqaralyq, respýblıkalyq baıqaýlarda júlderi oryndarǵa ıe bolýda.
Ónerpazdyń estetıkalyq talǵammen oryndaýshylyq qabiletin damytýda «Qýyrshaq teatry» úıirmesiniń orny tipti erekshe. Úıirme oqýshylary ózderi somdaǵan ertegilerin saraı sahnasynda, balabaqshalarǵa qoıyp kishkentaı kórermenderiniń qoshemetine bólenip júr.
«Bala Álemi-2023» atty respýblıkalyq baıqaýynda án janry boıynsha bas júldege Taldyqorǵandyq Aqbota Áset laıyq dep tanylǵan.
«Jalpy, Oqýshylar saraıy jeti jylda úlken jetistikterge qol jetkizdi. Joǵaryda atap ótkenimdeı, balalarymyz kóptegen jarystardan tek aldyńǵy qatardan kórinip júr. Oqýshylardyń shyǵarmashylyǵyn shyńdaý, daryndy balany dáripteý osynda jumys isteıtin árbir ustazdyń basty mindeti. Aldaǵy jylǵa da jospar aýqymdy», - dep atap ótti Saraı dırektory.