Taldyqorǵandaǵy jármeńkede bir mezette 500 kitap satyldy

<p>TALDYQORǴAN. KAZINFORM &ndash; Oblys ortalyǵyndaǵy Kórkemóner galereıasynda &laquo;Jetisu book fair&raquo; kitap jármeńkesi ótti. Jármeńkede &laquo;Ziyat&raquo;, &laquo;Atamura&raquo;, &laquo;Asyl qazyna&raquo; sııaqty kitap dúkenderi men jeke kásipkerler jáne jergilikti aqyn-jazýshylar ózderiniń 500-den astam kitabyn satylymǵa shyǵardy. Olardyń ishinde shetel jáne qazaq ádebıeti klassıkteriniń shyǵarmalary, balalarǵa arnalǵan ertegiler men entsıklopedııalar, pýblıtsıstıkalyq, motıvatsııalyq eńbekter de bar.</p>

Osy kúni jazýshy Qanat Tileýhannyń «Ziyat» baspasynan ózi shyǵarǵan «Shatyrdaǵy áıel» kitabynyń tusaýy kesildi.

Kitap jármeńkesiniń ashylý saltanatyna qatysqan oblys ákiminiń orynbasary Marlen Kólbaev is-sharanyń mán-mańyzyna qysqasha toqtaldy.

– Urpaq tárbıesinde, qoǵamnyń damýynda kitaptyń róli zor. Sondyqtan kitap oqý mádenıetin qalyptastyrý men nasıhattaý, qazaq ádebıetin damytýǵa qoldaý jasaý – bizdiń ortaq mindetimiz. Adam ómirde óz ornyn tapqysy kelse, qandaı da bir jetistikke jetemin dese, eń aldymen kitap oqýy kerek. Búgingi jármeńkeni jazǵy mezgildi kútpeı, jyldyń basynan bastap ketti. Endi bul kitaptardy basqa aýdan-qalalarǵa da jetkizetin bolamyz, - dedi Márlen Kólbaev.

Іs-sharaǵa arnaıy kelgen QR Mádenıet jáne aqparat mınıstriniń keńesshisi Serik Sarybaı óz sózinde Jetisý kitaphanasy serııasymen jaryq kórgen kitaptardyń birneshe danasyn Ulttyq Akademııalyq kitaphananyń qoryna tapsyryp, kitaptardyń PDF formattaǵy nusqasyn kazneb.kz saıtyna berý kerektigi týraly usynysyn jetkizdi. Al QR Jazýshylar odaǵy tóraǵasynyń orynbasary Beıbit Sarybaı tsıfrlyq tehnologııanyń qanshylyqty qarqyndy damyǵanyna qaramastan, kitap adamzattyń eń basty serigi bolyp qala beretinin aıtty.

– Jetisý oblysynda jergilikti qalamgerlerdiń kitaptaryn oblys ákimdiginiń qoldaýymen shyǵarý dástúri burynnan qalyptasqan jaqsy úrdis. Ol áli de jalǵasyp keledi. Ótken jyly 13 kitaptyń tusaýyn kestik. Bul kitaptar da búgin osy jármeńkede oqyrmanǵa usynylyp otyr. Bıylǵy jyly da bul ıgi is jalǵasady. Bul rette Jetisý tarıhyna jáne ólketaýǵa qatysty kitaptar shyǵarýǵa basymdyq bergeli otyrmyz, - deıdi oblystyq mádenıet, arhıvter jáne qujattama basqarmasynyń basshysy Qýanysh Súleımenov.

Kitap jármeńkesinde óz týyndylaryn satylymǵa usynǵan jergilikti aqyn-jazýshylar, jýrnalıster men sýretshiler arasynda atap aıtqanda Núsipbaı Ábdirahym, Ámire Árin, Jaqan Barımbekov, Saǵynysh Namazshamova, Gúlbaqyt Qasen, Jangeldi Nemerebaı, Samat Slıamǵazın, Qajet Andas, Azamat Nurmuhan, Muhtar Kúmisbek bar.

Kitap jármeńkesin oblystyq mádenıet, arhıvter jáne qujattama basqarmasynyń qoldaýymen S. Seıfýllın atyndaǵy kitaphana ótkizýde. Jármeńke 29 qańtarǵa deıin jalǵasady. Іs-shara aıasynda «Muzycal party» klascıkalyq mýzyka keshi, «San suraqqa saıahat» vıktorınalyq oıyndar jáne «Bıblıo sport» alańynda toǵyzqumalaq jáne shahmat oıyndary uıymdastyrylady.