Taldyqorǵanda jarylǵysh zat qoıyldy dep jalǵan aqpar bergen azamat 2 jyl 6 aıǵa sottaldy

<p>TALDYQORǴAN.KAZINFORM &mdash; Taldyqorǵan qalalyq soty terrorızm aktisi týraly jalǵan habarlama bergen azamatqa qatysty qylmystyq isti qarady. Ol QK-niń 273-baby boıynsha kináli dep tanylyp, 2 jyl 6 aıǵa bas bostandyǵynan aıyryldy.</p>

Taldyqorǵan qalalyq soty taratqan málimetke súıensek, jalǵan aqpar taratqan azamat
buryn asa aýyr qylmys jasaǵany úshin 25 jylǵa bas bostandyǵynan aıyrylǵan. Ol
2024 jyldyń qarasha aıynda № 71 túzetý mekemesinde uıaly telefon arqyly 112- ge qońyraý shalyp, Taldyqorǵan qalasyndaǵy avtobeket pen orta mekteptiń birinde jarylǵysh zat qoıylǵany týraly habarlaıdy.

Sonymen qatar 103-ke habarlasyp, avtovokzalǵa birneshe jedel járdem brıgadasyn jiberý kerektigin, 15 mınýttan keıin ǵımarat jarylatynyn aıtqan. Keıin 102 nómirine qońyraý shalyp, aqparattyń oqý-jattyǵý emestigin rastaǵan.

— Quqyq qorǵaý organdary orta mektep pen avtovokzal ǵımaratynan adamdardy evakýatsııalady. Tekserý barysynda bul ǵımarattardan tyıym salynǵan nemese jarylǵysh zattar tabylǵan joq. Sottalýshynyń kinási kýágerlerdiń aıǵaqtarymen jáne is boıynsha jınalǵan basqa da dáleldemelermen rastaldy. Sot úkimimen J. QK-niń 273-baby boıynsha kináli dep tanylyp, 2 jyl 6 aıǵa bas bostandyǵynan aıyrý jazasy taǵaıyndaldy, — delingen Taldyqorǵan qalalyq sotynyń habarlamasynda.

Burynǵy úkim boıynsha ótelmegen jaza ishinara qosylyp, J- ǵa túpkilikti 25 jyl bas bostandyǵynan aıyrý jazasy belgilendi. Sot úkimi zańdy kúshine engen joq. Eske salaıyq osyǵan deıin Jetisý oblysynda robot sot oryndaýshylar jumys isteıtinin jazǵanbyz.