TALDYQORǴAN. KAZINFORM – Taldyqorǵan qalasynda voleıboldan erlerdiń ulttyq lıga komandalary arasynda Qazaqstan chempıonatynyń úshinshi týry aıaqtaldy.
Úshinshi týrdyń ortalyq kezdesýi «Jetisý» men «Aqtóbe» arasynda ótti.
Byltyr taldyqorǵandyqtar el chempıonatynda qola júldeger atansa, aqtóbelikter kýbok pen sýperkýbokty jeńip alǵan edi.
Seısenbi kúni «Aqtóbe» 15 match boıy jeńilmeı kele jatqan Oraldyń «Jaıyǵyn» jeńgen bolatyn. Bul joly Marat Adryshevtiń shákirtteri aqtóbelikterge des bermedi — 3:0 (25:22, 25:17, 25:17). Osylaısha, «Jaıyq» 46 upaımen kósh bastasa, «Aqtóbe» (38 upaı) ekinshi orynda qaldy. Al «Jetisý» 37 upaımen úzdik úshtikti túıindedi.
«Ushqyn-Kókshetaýdy» 3:0 (25:18, 25:21, 25:15) esebimen tize búktirgen «Pavlodar» 34 upaımen tórtinshi orynǵa taban tiredi.
SQO-nyń «Esilin» 3:0 (25:15, 25:21, 25:23) esebimen qapy qaldyrǵan byltyrǵy chempıon «Taraz» 23 upaımen jetinshi satydan asa almady.
Tórtinshi týr oıyndary 16-24 aqpanda Pavlodar qalasynda ótedi.
Eske sala keteıik, budan buryn «Atyraýdyń» almatylyq «Býrevestnıkti» qapy qaldyrǵanyn jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).