Taldyqorǵanda tuńǵysh ret jiti leıkoz qaterli isigine shaldyqqan naýqas jazylyp shyqty

<p>TALDYQORǴAN. KAZINFORM &mdash; Jetisýda oblystyq aýrýhananyń gematologııa bóliminde alǵash ret jiti promıelotsıtti leıkozben aýyrǵan áıel jazylyp shyqty. Taldyqorǵandyq mamandar syrqatty zamanaýı hımıoterapııamen em-dom júrgizý arqyly syrqatynan jazyp alǵanyn málimdedi.</p>

Aýrýy asqynyp, densaýlyǵy syr bergen áıel aldymen qalalyq aýrýhanaǵa túsip, sodan keıin tamyz aıynyń sońynda mindetti áleýmettik medıtsınalyq saqtandyrý sheńberinde boljamdy «jedel promıelotsıttik leıkoz» dıagnozymen oblystyq aýrýhanaǵa joldanady.

Zerthanalyq jáne aspaptyq zertteýlerden keıin dıagnoz rastalǵan. Dárigerler naýqasqa súıek kemiginde qaterli jasýshalardy tolyq basýǵa baǵyttalǵan zamanaýı hımıoterapııa shemasymen em taǵaıyndaǵan.

— Úıde murnymnan jáne ıegimnen qan toqtamaı 1 apta júrdim. Esimdi bilmeı keldim. Birinshi qandy toqtatty, sodan keıin hımııaterapııany bastady, bári basyldy. Qazir osy medıtsınalyq ujymnyń arqasynda jaǵdaıym jaqsy, — dedi emdelýshi Anar Balapanova.

Naýqas bólimshege túsken kezde qannyń uıý kórsetkishi tómen, anemııa, gıperleıkotsıtoz baıqalǵan. Qazir hımıoterapııadan keıin búkil kórsetkishter qalpyna kelgen. Qan quıýǵa táýeldi emes.

Foto: Jetisý oblystyq aýrýhanasy

— Naýqasqa dıagnoz qoıylǵannan keıin 4-5 kúnde hımııa terapııasyn bastap kettik. Bul onkogematologııa bólimshesinde emdelgen súıek maıy remıssııasyna ketken eń alǵashqy naýqastyń biregeıi desek te bolady. Óıtkeni buǵan deıin jiti leıkozben túsken naýqastardyń bári Astana men Almatyǵa jiberiletin. Bul naýqas jolǵa jaramaıtyn bolǵandyqtan, óz bólimshemizde emdeýdi jón dep taptyq. Qazan aıynyń sońynda alǵan taldaý boıynsha blastyq jasýshalar múlde anyqtalǵan joq jáne qannyń barlyq kórsetkishteri qalpyna keldi, — dedi gematologııa bóliminiń meńgerýshisi Erlan Amangeldınov.

Astana sııaqty alys qalalarǵa barmaı-aq turǵylyqty jerden dertine shıpa tapqan emdelýshi taldyqorǵandyq mamandarǵa óz rızashylyǵyn bildirdi.

Eske salaıyq, buǵan deıin Jetisý oblysynda medbıke naýqastardyń atynan 6 mln teńgege jýyq nesıe rásimdegenin jazǵanbyz.