Taldyqorǵanda eks-súıiktisin baýyzdamaq bolǵan er adamnyń soty bastaldy

<p>TALDYQORǴAN. KAZINFORM &mdash; Taldyqorǵanda burynǵy súıiktisin óltirýge oqtaldy dep aıyptalǵan er adamǵa qatysty sot protsesi bastaldy. Іs Jetisý oblysynyń qylmystyq ister jónindegi mamandandyrylǵan aýdanaralyq sotynda buzaqylyq jáne buzaqylyq nıetpen kisi óltirýge oqtalý boıynsha júrip jatyr.</p>

Aıta keteıik, oqıǵa byltyr qazan aıynda qaladaǵy sulýlyq salondarynyń birinde bolǵan. Jetisýlyq jigit 28 jastaǵy boıjetkendi soqqyǵa jyǵyp, keńse pyshaǵymen tamaǵyn kespek bolǵan. Qyzdyń jan-aıqaıyn estigen kórshi ǵımarattaǵy áıel oqıǵa ornyna birden jetedi. Aıyptalýshy oǵan da qol kóterip, artynsha mekemeden shyǵyp ketken. Onyń áreketi beınebaqylaý kamerasyna túsip qalady. Jedel járdemmen aýrýhanaǵa jetkizilgen qyzǵa «jaraqattan keıingi parıetaldy, oń jaqtaǵy ishki moıyn tamyrynyń neokklıýzııalyq trombozy, jabyq bas mıynyń jaraqaty, mıdyń shaıqalýy, terisiniń jumsaq tinderiniń kógerýi» degen dıagnoz qoıylyp, shuǵyl túrde hırýrgııalyq bólimge jatqyzyldy.

Jábirlenýshiniń aıtýynsha, ol buǵan deıin de bul jigitten taıaq jep kelgen. Protsess barysynda ol sottan maksımaldy jaza taǵaıyndaýdy surady.

«Jábirlenýshi tarap, ıaǵnı meniń qorǵaýymdaǵy azamatsha sottan qatań jaza surap jatyr. Qylmystyq kodekstiń 99-baby 2-bóligi jáne de 293-baptyń 3-bóligi boıynsha» — dedi jábirlenýshiniń advokaty.

Dese de, kúdikti óz kinásin tolyq moıyndamady. Osyǵan baılanysty sot otyrysy keıinge qaldyryldy.

«Atalǵan is boıynsha búgin oblystyq qylmystyq ister jónindegi mamandandyrylǵan aýdanaralyq sotynda sot otyrysy ótti. Jábirlenýshi men kýágerlerden, aıyptalýshydan jaýap alyndy. Kelesi sot otyrysy 5 sáýirde ótedi», — dedi Jetisý oblysy qylmystyq ister jónindegi mamandandyrylǵan aýdanaralyq sotynyń baspasóz hatshysy Máýlen Erjanov.