Taldyqorǵanda 20 jastaǵy jigitti júk kóligi basyp ketti

<p>TALDYQORǴAN. KAZINFORM &ndash; Jetisý oblystyq polıtsııa departamentiniń málimetinshe, jol-kólik oqıǵasy Jeltoqsan men Raqyshev kósheleriniń qıylysynda bolǵan. Júk kóligi jaıaý júrginshiler ótkelinen ótip bara jatqan er adamdy basyp ketken.</p>

Oblystyq tótenshe jaǵdaılar departamentiniń aqparatyna súıensek, jigit kóliktiń astynda qysylyp qalǵan. Ony qutqarýshylar arnaıy quraldyń kómegimen áreń shyǵaryp alǵan.

Foto: TJD

«Búgin Jetisý oblysynyń tótenshe jaǵdaılar departamentine Taldyqorǵan qalasynda jol kólik oqıǵasy bolǵandyǵy týraly habarlama tústi. Oqıǵa ornyna jedel qutqarýshylar toby jiberildi. Zardap shekken adam kóliktiń astynda qysylyp qalǵan eken. Ony gıdravlıkalyq quraldyń kómegimen shyǵardyq», - deıdi Jetisý oblystyq TJD basqarma bastyǵy Rınat Karandashev.

Zardap shekken azamat birden aýrýhanaǵa jetkizildi. Ázirge onyń qandaı jaraqat alǵany belgisiz. Al avtokólik arnaıy turaqqa qoıyldy.

«Atalmysh fakti boıynsha sotqa deıingi tergeý bastaldy. Al ZIL kóligi arnaıy turaqqa qoıyldy. Qurmetti aımaq turǵyndary men qonaqtary, jaıaý júrginshiler ótkelderinen ótý kezinde abaı bolyńyzdar», - deıdi Jetisý oblystyq polıtsııa departamentiniń baspasóz qyzmeti.

Eske sala keteıik, buǵan deıin Taldyqorǵan turǵynynan 20 mln teńgeniń esirtkisi tárkilengenin jazǵanbyz.