Senat tóraǵasy qazaqtyń batyr qyzy Álııa Moldaǵulovanyń eskertkishine gúl shoǵyn qoıdy

<p>ASTANA. KAZINFORM &ndash; Senat tóraǵasy Máýlen Áshimbaev Jeńis kúnine oraı qazaqtyń batyr qyzy Álııa Moldaǵulovanyń eskertkishine gúl shoǵyn qoıyp, soǵys jyldarynda qaza tapqan jaýyngerlerdiń rýhyna taǵzym etti. Іs-sharaǵa eńbek jáne kúshtik qurylymdardyń ardagerleri, áskerı qyzmetshiler men Senat depýtattary qatysty.</p>

«Álııa Moldaǵulovanyń erligi jas býyn úshin qashanda úlgi. Ol nebári jıyrma jasynda qaharmandyǵymen tanyldy. Biz elimizde beıbitshilik pen kelisim saqtalyp, jerimizde eshqashan soǵys bolmaýy úshin judyryqtaı jumylýymyz qajet. Osy jolda el bolyp eńbek etýimiz kerek. Prezıdentimiz Qasym-Jomart Kemeluly Toqaevtyń tapsyrmasy boıynsha qazir elimizde Jeńis kúnine arnalǵan is-sharalar ótip jatyr. Soǵys kezinde bir mıllıon eki júz myń qazaqstandyq maıdanǵa attandy. Olardyń jartysy elge oralǵan joq. Jeti júz myńnan astam otandasymyz tylda kúndiz-túni eńbek etti. Munyń bári Jeńisti jaqyndatýǵa qosylǵan úlken úles ekeni anyq. Sondyqtan Otan úshin opat bolǵandardyń erlikterin umytpaı, ony dáripteý biz úshin asa mańyzdy», – dedi Máýlen Áshimbaev.

Sonymen qatar búgin Palata Spıkeri bir top depýtatpen birge soǵys ardageri Rzaǵul Baıkeshevti Jeńis kúnimen quttyqtady. Aqsaqal 1923 jyly týǵan. Soǵys kezinde ol Kalının oblysynda, Ryjov, Velıkıı Lýg qalalaryndaǵy shaıqastarǵa jáne Polsha, Rýmynııa, Vengrııany azat etýge qatysqan. Erligi úshin Otan soǵysy ordenimen, marshal G.K.Jýkov medalimen jáne basqa da nagradalarmen marapattalǵan.

Máýlen Áshimbaev maıdangerdi quttyqtap, Jeńis kúni keler urpaqtyń beıbit zamany úshin óz ómirlerin báıgege tigip, etigimen sý keshken erlerdiń erligine kórsetilgen qurmet ekenin aıtty.

Sondaı-aq Senat Tóraǵasy ardagerge el-jurttyń izgi tilegin jetkizdi.

«Soǵys jyldarynda aǵa býyn eren erliktiń ozyq úlgisin kórsetti. Erlik eshqashan umytylmaıdy. Sondyqtan búgin Sizdi quttyqtaý úshin arnaıy keldik. Maıdangerlerge qurmet kórsetý, atalarymyz ben ákelerimizdiń rýhyna taǵzym etý – bizdiń perzenttik paryzymyz. Bizdiń búgingi beıbit ómirimiz ben tynyshtyǵymyz, birinshi kezekte, Sizderdiń erlikterińizdiń nátıjesi. Munyń bári óskeleń urpaq úshin árdaıym úlgi-ónege bolyp qala beredi. Memleket basshysynyń bastamasymen qabyldanǵan «Aıbyn» ordeniniń úsh dárejesin dańqty batyrlarymyz – Saǵadat Nurmaǵambetovtiń, Baýyrjan Momyshulynyń jáne Raqymjan Qoshqarbaevtyń atymen ataý týraly zań da sony kózdeıdi», – dedi Máýlen Áshimbaev.