Talapkerler óńir ákimdikteri bólgen 2,5 myń grantqa talasa alady

ASTANA. QazAqparat –Ǵylym jáne joǵary bilim mınıstri Saıasat Nurbek óńir ákimdikteri bólgen bilim granttary týraly aıtty, dep habarlaıdy QazAqparat.

«Bıyl jergilikti atqarýshy organdar 2500 grant bóldi. Granttar óńirlerde suranysqa ıe mamandyqtar boıynsha bólingen.

Bilim granttaryn taǵaıyndaý jónindegi konkýrsqa qatysý úshin talapkerler joǵary oqý oryndarynyń qabyldaý komıssııalary arqyly ótinish berýi qajet.

Ákimdikter jyl saıyn basym mamandyqtar boıynsha nysanaly daıarlyqqa granttar bóledi. Negizinen óńirlerge pedagogter, dárigerler, ınjenerler jáne IT-mamandar qajet», - dep jazdy mınıstr.

S.Nurbektiń aqparatyna súıensek, bıyl, 1475 grant «Pedagogıka ǵylymdary» jáne 424 grant «Densaýlyq saqtaý» baǵytyna bólingen.

«Ótken jyldaǵydaı, 1 myńnan astam grantty elorda ákimdigi bólip otyr. Bul – ákimdikter arasyndaǵy eń úlken kórsetkish. Odan keıingi orynda: Shyǵys Qazaqstan oblysy – 270 grant, Abaı oblysy – 200 grant, Mańǵystaý oblysy – 175 grant, Aqmola oblysy – 160 grant jáne Jetisý oblysy – 100 grant. Qalǵan aımaqtar 100-den az grant bólgen.

Al Shymkent jáne Almaty qalalarynyń, sondaı-aq Túrkistan, Qyzylorda, Pavlodar oblystarynyń ákimdikteri bakalavrıat mamandaryn daıarlaýǵa grant bólmegen», - dedi vedomstvo basshysy.

Úmitker JOO-nyń qabyldaý komıssııasyna kelesi qujattardy usynady:

- bilimi týraly qujatyn;

- UBT sertıfıkatyn,

- jeke basyn kýálandyratyn qujattyń kóshirmesin;

- jeńildik sanatyn rastaıtyn qujattar (bar bolǵan jaǵdaıda).

Qujattardy qabyldaý merzimi týraly aqparatty ákimdikterden, sondaı-aq joǵary oqý oryndarynyń qabyldaý komıssııalarynan alýǵa bolady. Grant berý týraly sheshimdi ákimdik janynan qurylǵan arnaıy komıssııa qabyldaıdy.

Joǵary oqý oryndaryna qabyldaý 25 tamyzda aıaqtalady.