Talapker-2023: Bıyl bakalavrıatqa 73 myń grant bólingen

ASTANA. QazAqparat – 2023 jylǵy negizgi UBT qorytyndysyn jarııalaǵan Ǵylym jáne joǵary bilim vıtse-mınıstri Qýanysh Erǵalıev bıyl bakalavrıatqa 73 myń grant bólingenin atap ótti, dep habarlaıdy QazAqparat tilshisi.

«Bıyl bakalavrıatqa 73 myń grant bólinip otyr. Memleket basshysynyń tapsyrmasy boıynsha barlyq granttyń 60%-y tehnıkalyq mamandyqtarǵa bólindi.

Granttardyń basym bóligi «Injenerlik, óńdeý, qurylys salalary» bilim berý baǵdarlama toptaryna bólindi. Olardyń sany 18 744 grant degen sóz. Al «Pedagogıkalyq ǵylymdarǵa» – 12 560 grant, «Aqparattyq-kommýnıkatsııalyq tehnologııalar» salasyna – 10 103 grant, «Jaratylystaný ǵylymdary, matematıka jáne statıstıka» baǵytyna – 7 388 grant tıesili. «Serpin» baǵdarlamasy arqyly túsýshilerge 3 653 grant bólingen», - dedi vıtse-mınıstr.

Onyń aıtýynsha, bıyl halyq tyǵyz qonystanǵan batys jáne jańadan qurylǵan óńirlerdiń jastary úshin granttar bólingen.

«Granttar bylaı bólingen: Atyraý oblysy – 1500, Mańǵystaý oblysy – 1500, Ulytaý oblysy – 300, Jetisý oblysy – 300, Abaı oblysy – 500, Shymkent – 400, Túrkistan oblysy – 500. Bul granttar pedagogıkalyq, ınjenerlik, IT mamandyqtarǵa jáne jaratylystaný ǵylymdaryna bólingen.

Bıyl pedagogıkalyq kvota 47%-ǵa deıin ulǵaıtyldy. Sondaı-aq, alǵash ret aýyl sharýashylyq jáne ınjenerlik baǵyttardy qoldaý maqsatynda pılottyq rejımde arnaıy kvota bólindi. Bul granttar óńirlik JOO-larda ornalastyrylady», - dedi Qýanysh Erǵalıev.