Talantty jastardyń jolyn ashýymyz kerek - Elbasy
«Búgingi álemge áıgili iri kompanııalardyń negizin jas kásipkerler qalaǵanyn barlyǵyńyz bilesizder. Mysaly Feısbýkti Mark Tsýkerberg 19 jasynda oılap tapty. Maıkrasofty Beıl Geıts 20 jasynda, Aplle kompanııasyn Stıv Djobs 21 jasynda qurdy. Bizde de 13 jasynda QBTÝ-dyń 2 kýrsyn oqyp jatqan balany qazir ǵana tyńdadyq. Olardyń barlyǵy aspannan salbyrap túsken joq. Talant degen de bar, ony jasyrýǵa bolmaıdy. Biraq Eınshteın aıtqandaı, talantyń 90 paıyzy eńbek», - dedi shara barysynda Elbasy.
Memleket basshysy EKSPO nysandarynyń biri startap-jobalardy ázirleýmen aınalysatyn jastarǵa berilgenin atap ótti.
«Sol jerde Qazaqstannyń 200 jasy óz sharýalaryn jasap jatyr. Men baıaǵyda arnaıy bir úlken ǵımarat salyp, birdeme jasap, ony ary qaraı damytamyn degen balalardyń barlyǵyna múmkinshilik jasaý kerek dep oılaýshy edim. Olardyń oılap tapqan jobalaryn kommertsıalızatsııalaýǵa kómektesý kerek. Halqymyzda «aqyl jastan, asyl tastan» degen naqyl sóz bar. Bizdiń jastarymyzda mundaı qasıet bar ekenin kórip otyrmyz. Myna zalǵa barlyq talanttarymyzdy jınaı almaımyz, sımaımyz. Biraq barlyq jastarymyzǵa jol ashý mańyzdy», - dedi QR Prezıdenti.
Aıta keteıik, Astanada «Táýelsizdiktiń urpaqtary» ataýymen Jastar jylynyń ashylý saltanaty ótip jatyr.
Sharaǵa Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler keldi.
Eske sala ketsek, QR Prezıdenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn.
Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.