Taksısterdiń densaýlyǵyn qadaǵalap jatqan eshkim joq - Eńbek mınıstrligi

ASTANA. QazAqparat – Jumys berýshiler taksı júrgizýshileriniń ómiri men densaýlyǵyna nemquraıly qarap otyr. Bul týraly Eńbek jáne halyqty áleýmettik qorǵaý mınıstrligi málim etti, dep habarlaıdy QazAqparat tilshisi.

Taksısterdiń ómiri men densaýlyǵyna jumys berýshi jaýapty bolýy tıis, ıaǵnı taksopark ıesi jumysqa qabyldamas buryn júrgizýshiniń densaýlyǵyna qatysty tıisti qujattardy talap etip, tekserýi tıis. Degenmen, taksı júrgizýshilerinen suhbat alý barysynda densaýlyq jaǵdaıyna qatysty anyqtamalardyń suralmaıtyny belgili boldy. Taksı júrgizýshilerin qabyldaý onlaın júredi. Ol jerde aty-jóni, kólikti júrgizý deńgeıi men avtomobıldiń jaǵdaıy ǵana suralady, -

dedi mınıstrlikke qarasty eńbek resýrstaryn damytý ortalyǵynyń basqarýshy dırektory Aleksandra Molchanovskaıa «Qazaqstannyń eńbek naryǵy týraly ekinshi ulttyq baıandama» atty onlaın-konferentsııada.

Ortalyq basshysynyń málimdeýinshe, taksı júrgizýshileriniń artyq eńbektenýi boıynsha da baqylaý joq.

Taksı baǵasyna kelsek, taksoparkter qundy ózderi belgileıdi. Sonymen qatar, taksoparkter túrli naýqan ótkizedi. Mysaly, apta ishinde 200-den astam reıs jasa degen sekildi. Ony estigen taksıst demalyssyz kúni-túni jumys isteıdi. Al, onyń densaýlyǵyn qadaǵalap jatqan eshkim joq, -

deıdi ol.

Sóz sońynda mınıstrlik ókili atalǵan másele boıynsha shuǵyl sheshim qabyldaý kerektigin aıtty.