Taksı júrgizýshilerine jeke ereje ázirleý kerek - Erbolat Dosaev

ALMATY. QazAqparat - Megapolıste taksı qyzmetin kórsetetin oryndardy rettep, olarǵa jeke erejeler ázirleý kerek. Bul týraly Medeý aýdany turǵyndarymen kezdesýi barysynda Erbolat Dosaev aıtty, dep habarlaıdy QazAqparat tilshisi.

Qala basshysymen kezdesýge kelgen Almaty turǵyndarynyń biri «Halyk Arena» aýmaǵyndaǵy taksı júrgizýshilerine shaǵymdanyp, sol jerge Sergek» kameralary men jol belgilerin ornatýdy usyndy.

«Meniń usynysym Qulja tas jolynyń boıynda ornalasqan «Halyk Arena» aıaldamasyna qatysty. Tańerteń jáne keshki ýaqytta sol jerge taksı júrgizýshileri kóptep jınalady. Qalaǵan jerlerine toqtap, jol qozǵalysy erejelerin buzyp, jolda kólik qozǵalysyna kedergi jasaıdy. Sonyń saldarynan Talǵar tas joly men Rysqulov dańǵylynyń qıylysynda keptelis qalyptasady. Sondyqtan jol belgileri, «Sergek» kameralaryn ornatyp, sary jolaqtardy salýdy usynamyn»,- deıdi Medeý aýdanynyń turǵyny.
Almaty ákimi qalalyq mobıldilik basqarmasyna qala turǵynynyń usynysyn qarastyrý jóninde tapsyrma beretinin aıtty.
«Bizdiń taksı júrgizýshileri klıentterine jetý úshin qoldan kelgenniń bárin jasaıdy. Bul másele tek Qulja tas jolynda ǵana emes, sonymen qatar Altyn Orda men Barlyq bazary mańynda da bar. Taksı qyzmetin kórsetetin oryndardy rettep, olarǵa jeke erejeler ázirleý kerek dep oılaımyn. «Almaty qalasynyń erekshe mártebesi týraly» zańǵa máslıhat tıisti normalardy qabyldaıtyndaı ózgerister engizýge bolady degen úmittemin. Bıyl da «Sergek» kameralyq júıesi qosymsha engizip jatyrmyz. Josparda bolsa, ornatamyz. Meniń oıymsha, elimizde taksı qyzmetin rettemeıinshe tártip bolmaıdy. Búkil álemde taksı júrgizýshilerine arnalǵan turaqtar bar, biz de osyǵan kelemiz dep úmittenemin»,- deıdi Erbolat Dosaev.
Sonymen qatar ol «Halyk Arenadaǵy» másele boıynsha jaýapty mekeme basshylaryna problemany egjeı-tegjeıli zerdeleýge bir aı ýaqyt beretinin jetkizdi.
Buǵan deıin Almaty ákimi baraholka bazary boıyndaǵy retsiz avtoturaqtardy joıýdy tapsyrǵan bolatyn.