Taqsaı hanshaıymy tabylǵan jerden mýzeı uıymdastyrýǵa bolady - tarıhshy
Onyń aıtýynsha, Elbasy «Uly dalanyń jeti qyry» maqalasynda barsha tarıhshylarǵa jańa mindetter júktep otyr.
Prezıdent atap ótkenindeı, «Uly dalanyń uly órkenıetteri» atty jalpyulttyq tarıhı rekonstrýktsııalar klýbyn quryp, sonyń negizinde Astanada jáne Qazaqstannyń ózge de óńirlerinde ejelgi saqtar, ǵundar, uly túrki qaǵandarynyń dáýiri jáne basqa da taqyryptar boıynsha festıvaldar ótkizýge bolady. Buǵan qyzyǵýshylyq bildirgen adamdardy tarta otyryp, osy taqyryptar aıasyndaǵy jumystardy bir mezgilde júrgizýge bolady».
«Osy oraıda Batys Qazaqstan oblysy, sonyń ishinde Terekti aýdany tarıhı eskertkishterge baı. Sonyń jarqyn kórinisi - Qazaqstannyń kıeli oryndarynyń qataryna engizilgen Taqsaı qorǵan kesheni», - deıdi Álııa Tunyqova.
Dolınnyı aýyly mańyndaǵy Taqsaıdan Altyn hanshaıymnyń tabylýy Terektini kúlli ǵylymı álemge málim etti. Ejelgi sarmat dáýirine jatatyn aqsúıek áıeldiń jerlengen ornynan altyn buıymdar men zergerlik áshekeılerdiń tabylýy mundaǵy mádenıet deńgeıiniń joǵary bolǵandyǵyn kórsetedi. Sarmattardyń salt-dástúri men dinı nanym-seniminen habardar etedi. Elimizge tanymal arheolog, tarıh ǵylymdarynyń doktory Murat Sydyqov Qazaqstannyń batys óńirin ejelden kóshpeli taıpalardyń mekendegenin únemi aıtyp keledi. Mine, sol taıpalardyń zańdy muragerleri - qazaqtar.
«Bıyl metsenattardyń qoldaýymen altyn hanshaıymǵa kesene ornatyldy. Endi osy jerden mýzeı ashý jóninde áńgime qozǵalýda. Nesi bar, mundaı tarıhı oryndy bolashaqta túrli festıvalder ótkizetin mýzeıge aınaldyrýǵa tolyq bolady. Sonymen qatar Terekti aýdanyndaǵy qazirgi Podstepnyı aýyly arqyly Uly jibek joly ótkeni belgili. Kezinde ol Menıalyı dvor dep atalǵan eken. Memleket basshysynyń «Uly dalanyń jeti qyry» maqalasy osyndaı tarıhı oryndardy tyńǵylyqty zertteýge jol ashyp otyr. Oǵan óz úlesin qosý - barlyq tarıhshylardyń, elim degen azamattardyń boryshy», dedi QazAqparat tilshisine Á.Tunyqova.