Taqııaly qyz — trendte: Pavlodarda Naýryz qarsańynda erekshe baıqaý bastaldy

<p>PAVLODAR. KAZINFORM — Buqar jyraý mýzeıi mektep oqýshylarynyń ulttyq kıimge qyzyǵýshylyǵyn arttyrýǵa den qoıyp otyr. Naýryz meıramy qarsańynda qyz balalar arasynda taqııa tigýden aýqymdy saıys ótkizilmek.</p>

«Taqııaly qyz — trendte» atty taqııa tigý óneri boıynsha baıqaý óńirde tuńǵysh ret uıymdastyrylǵaly otyr.

6-9 synyp oqýshylary arasynda ótetin baıqaýǵa Pavlodar qalasyndaǵy mektep oqýshylary qatysa alady.

«Ul-qyzdarymyzdyń arasynda ulttyq kıimderimiz birtindep tanylyp kele jatyr. Qazir kópshilik tek toı-tomalaq pen merekelerde ǵana emes, kúndelikti ómirde de ulttyq mánerde tigilgen kıimderdi kıe bastaǵan. Al qazaq qyzynyń basyna kıiletin taqııanyń orny tipti bólek. Ertede qyz bala óse bastaǵannan ata-anasy taqııa kıgizgen. Oǵan nebir salpynshaq, shashaqtar, úki taǵyp, zerlegen. Taqııanyń qadirin jas urpaq tanyp ósýi kerek. Baıqaýdyń negizgi maqsaty da sol, -deıdi Buqar jyraý atyndaǵy ádebıet jáne óner mýzeıiniń dırektory Erbol Qaıyrov.

Baıqaý eki kezeńnen turady. Alǵashqy týrda qatysýshylar arasynan bes úzdik jumystyń ıegeri irikteledi.

Mektep oqýshylary qazaq qyzdarynyń ulttyq bas kıimi — taqııany óz qoldarymen tigip ákelip, onyń jasalý joldary men tigý ádisterin, taqııanyń búgingi kúndegi mańyzyn baıandaýy tıis.

Al ekinshi kezeńge ótken qatysýshylar taqııany daıyn sulbalarymen tigip, áshekeılep, qazylar alqasynyń aldynda qorǵaıdy

Jeńimpaz atanǵan oqýshyǵa syılyqqa smartfon berilmek.