«Taqııaly depýtat»: Ulttyq kıim ulttyq rýhty qalyptastyrady

<p>ASTANA. KAZINFORM - QR Parlament Májilisiniń depýtaty Dáýlet Muqaev sońǵy ýaqytta ulttyq kıimge degen suranystyń arta bastaǵanyn ańǵarǵanyn aıtady. Tipti, Parlament qabyrǵasyndaǵy áriptesteriniń jumysqa oıý-órnegi bar kıimderdi kııýge qyzyǵýshylyǵy arta bastaǵan.</p>

Agenttik tilshisine bergen jaýabynda Májilis depýtaty stýdenttik kezden beri taqııa, tymaq kıip, jeńil jeıdesine ulttyq elementterdi tańbalap júretinin aıtty.

– Árıne, parlamentke alǵash kelgende bireýler «taqııańdy sheship tasta, bul jerdiń ózindik etıkasy, dress-kody bar» degen eskertý jasaıdy ma dep oılaǵanym ras. Biraq antty da taqııamen qabyldap, osy ýaqytqa deıin basymnan sheshken emespin. Áriptesterimniń kózqarasy durys. Qazir meni qoldap jatqan depýtattardyń qatary artty. Aldaǵy kúnderi parlament músheleri jalpy otyrysqa ulttyq kıim kıip keledi dep kútilýde. Óz basym áriptesterimniń týǵan kúnine taqııa, shapan syılap, ulttyq qundylyqtardy dáripteýge tyrysyp júrmin, – deıdi ol.

Dáýlet Muqaevtyń «ulttyq kıimderdiń baǵasy qymbat» degenderge jaýaby daıyn.

– Sapaly dúnıeniń qymbat bolýy zańdylyq. Erekshe dızaınerlik stılmen tigilgen kıim qymbat bolady da. Dese de, kıimderdi ulttyq elementtermen kómkerý asa qymbat turady dep eseptemeımin. Meniń basymdaǵy taqııa ári ketse 3-5 myń teńge aralyǵynda. Oıý-órnekterdi kıimge tańbalaý da odan qymbat turmas. ıAǵnı, qaltaǵa aıtarlyqtaı salmaq salmaıdy. «Qymbat» degen nárseni sanamyzdan alyp tastasaq eken. Ulttyq kıim kıip júrý ulttyq rýhymyzdy qalyptastyrady. Qarapaıym mysal, úı janyndaǵy dúkenge shapanmen, taqııamen kirip kelseńiz, ózge ulttyń satýshylary qazaqsha amandasyp jatady. Al kúndelikti kıimmen kirip qalsań «chto ıskalı?» dep avtomatty túrde til qatady, – deıdi depýtat.

Aıta keteıik, jýyrda Dáýlet Muqaev óziniń depýtattyq saýalynda ulttyq kıimderimizdi ulyqtaý maqsatynda respýblıkalyq deńgeıde «Ulttyq kıim» kúnin bekitý qajet ekenin aıtqan bolatyn.

«Ulttyq kıim – ultymyzdyń ulylyǵyn ulyqtaıtyn, ulttyq kodymyzdy bildiretin aıshyqty kórsetkish. Ulttyq kıimderimizdiń mol murasymen maqtana alatyndaı elmiz. «Birinshiden – ulttyq kıimderimizdi ulyqtaý maqsatynda respýblıkalyq deńgeıde «Ulttyq kıim» kúnin bekitý. Bul kún mádenı qundylyqtarymyzdy keńinen nasıhattap, óskeleń urpaqty otanshyldyqqa tárbıeleýdiń negizi bolar edi. Ekinshiden – memlekettik qyzmetkerler men halyqqa qyzmet kórsetetin ortalyq qyzmetkerleriniń kıimderine qazaqı aıdentıka elementterin qosý. Úshinshiden – ulttyq kıim óndiretin otandyq kásipkerlerge memleket tarapynan qoldaý kórsetip, bıznesti qoldaýǵa baǵyttalǵan granttarda ulttyq kıim kásibine basymdyq berý, halyq arasynda ulttyq kıimdi qoljetimdi etýge yqpal etip, suranysty arttyrý. Tórtinshiden - mektep oqýshylary kıetin ulttyq kıimder standartyn ázirlep engizý ári halyqaralyq túrli jarystarǵa baratyn azamattardyń formalaryna mindetti túrde ulttyq naqyshty beıneleý», - degen edi Májilis depýtaty.