Taıland Koroli bir jynystylardyń nekesi týraly zańǵa qol qoıdy
Taıland koroli el parlamenti qabyldaǵan bir jynysty nekeni zańdy túrde taný týraly zańǵa qol qoıdy. Osylaısha, Taıland Ońtústik-Shyǵys Azııadaǵy bir jynysty adamdar arasyndaǵy odaqtardy zańdastyrǵan birinshi memleket boldy.
Taıland parlamentiniń joǵarǵy palatasy maýsymda zańdy qoldady jáne ol seısenbide monarhııanyń resmı gazetinde jarııalandy. Ol 2025 jyldyń 22 qańtarynda kúshine enedi.
Zań neke degendi burynǵydaı er men áıeldiń emes, eki adamnyń seriktestigi dep tanıdy. Birjynysty juptar erli-zaıyptylarǵa beriletin salyq jeńildikterin paıdalanýǵa, bir-biriniń múlkin muragerlikke alýǵa jáne jubaıy es-tússiz jatqan jaǵdaıda ony emdeýge kelisim berýge quqyly bolady.
Birjynysty erli-zaıyptylar da bala asyrap ala alady. Alaıda, depýtattar tıisti komıtettiń «áke men sheshe» degen sózdiń ornyna «ata-ana» termınin qoldaný týraly usynysyn qabyldamady.
– Búgin biz atymyzdy neke týraly kýálikterge ǵana jazyp qoımaı, tarıhtyń jańa paraǵyna da jaza alamyz. Mahabbat kim bolyp týǵanymyzǵa qaramaıdy. Bul teńdik pen adamı qadir-qasıettiń merekesi, – dedi Taılandtaǵy LGBT quqyqtaryn qorǵaýshy Enn Chýmaporn.
Ol zań kúshine engen kúni myńnan astam LGBT juptarynyń úılený toıyn uıymdastyrmaq nıette ekenin aıtty.
Azııadaǵy jaǵdaı qandaı
Taılandta birjynysty nekeni taný úshin kúres 10 jyldan astam ýaqytqa sozyldy.
El turǵyndarynyń kópshiligi birjynysty nekeni qoldaıdy — ótken jyldyń sońynda júrgizilgen saýalnamaǵa respondentterdiń 96,6%-y oń kózben qaraıtyndyqtaryn aıtqan.
Barlyq Azııa elderiniń ishinde tek Nepal men Taıvan ǵana birjynysty nekeni zańdastyrǵan (kóptegen elder Taıvandy egemendi memleket retinde moıyndamaıdy).
Sıngapýr 2022 jyly otarshyldyq dáýirdegi bir jynysty qarym-qatynasty qylmys dep sanaıtyn zańnyń kúshin joıdy.