Taıland qazaqstandyqtarǵa elektrondy vıza beredi

ASTANA. QazAqparat - 2019 jyldyń aqpan aıynan bastap Taıland Qazaqstan azamattaryna E-VOA (e-Visa On Arrival) vızasyn bere bastaıdy, dep habarlaıdy QazAqparat QR Syrtqy ister mınıstrligine silteme jasap.

«2019 jyly 14 aqpannan bastap Taıland birqatar elderdiń, sonyń ishinde Qazaqstannyń da azamattary úshin el aýmaǵyna kelgende beriletin E-VOA (e-Visa On Arrival) vızasyn berý qyzmetin iske qosady. Atalǵan qyzmet qujattardy toltyrý, ımmıgratsııalyq qyzmet jumyskerleriniń olardy tekserýi jáne vızanyń rásimdelýin kútýge jumsalatyn áýejaıdaǵy ýaqytty aıtarlyqtaı azaıtady», - delingen QR SІM baspasóz qyzmetiniń resmı habarlamasynda.

E-VOA qyzmetin alý úshin Taılandqa saparǵa attanardan eń kemi 30 kún buryn jáne 24 saǵattan keshiktirmeı, arnaıy saıtqa kirip, tapsyrys berý qajet.

Azamattar elektrondy formany toltyryp, vıza aqysyn MasterCard, Visa, Union Pay nemese WeChat Pay jáne Alipay-diń nesıelik nemese debettik kartalary arqyly onlaın rejımde tóleı alady.

E-VOA qyzmetin paıdalanǵan týrıster Taılandtaǵy tórt negizgi halyqaralyq áýejaıdyń kez kelgenine kele alady: Sývarnabhýmı, Donmyang, Phýket jáne Chıangmaı halyqaralyq áýejaılary.

2019 jyldyń sońyna deıin bul qyzmet túri Taılandtaǵy basqa áýejaılarda qol jetimdi bolady.

Aıta keteıik, Taıland úkimeti Qazaqstannan kelgen týrısterge tegin vıza berý merzimin 2019 jyldyń 30 sáýirine deıin uzartty.