«Taǵzym» memorıalynyń avtorlary áleýmettik jelidegi synǵa jaýap berdi

ALMATY. QazAqparat- Qańtar qurbandaryna arnalǵan «Taǵzym» memorıalynyń sáýletshileri – Ǵaını Saǵıdýllaev pen Alekseı Ivjenko áleýmettik jelide eskertkishtiń sapasyn synaǵan jazbalarǵa qatysty pikir bildirdi, dep habarlaıdy QazAqparat tilshisi.

Áleýmettik jelide memorıaldyń sapasyn synaǵan vıdeo tarady.

Alekseı Ivjenkonyń aıtýynsha, vıdeoda keltirilgen derekter shyndyqqa janaspaıdy, al vıdeo avtory maman emes ekeni kórinip tur. Ol plıtkany granıtten ajyrata almady.

«Tas taqtalarda qoldanylǵan materıaldardyń barlyǵy tabıǵı – olar tek granıt, mármár, slanets sııaqty ártúrli tastar. Biz plıtka, keramogranıt sııaqty jasandy materıaldardy qoldanýdan ádeıi aýlaq boldyq, óıtkeni biz olardy el tarıhyndaǵy mańyzdy oqıǵalardy bildiretin keshen úshin jaramsyz dep sanadyq», - dep atap ótti sáýletshi.

Sonymen qatar, memorıal avtorlary, alańda jasandy qurylys materıaldary qoldanylmaǵanyn jetkizdi.

«Eden plıtkalary tabıǵı tastan, sý, ylǵal, sýyq kezde túsin ózgeretin granıtten jasalǵan. Muny kez kelgen maman biledi. Granıttiń joǵary ylǵaldylyqta basqa túske ózgerýi, onyń taza emes ekenin bildirmeıdi. Jerdegi plıtkalar arasyndaǵy bos oryndar arnaıy drenajdyq arnalar retinde jasalady. ıAǵnı, «jaryqtar» emes, jańbyr, erigen sý aǵatyn jerler. Beınerolık avtory bilmestikpen be, álde basqa sebeppen jalǵan aqparat taratqan, al shyn máninde bul onyń bedelin túsirý áreketi bolsa kerek», — deıdi Ǵaını Saǵıdýllaeva.

Alekseı Ivjenko eden plıtkalarynyń ornynan qozǵalyp ketýi aýa raıy jaǵdaılaryna baılanysty bolýy múmkin dep boljady, óıtkeni jelim aıazdan «jabyspady».

«Bul, árıne, merdigerdiń kemshiligi, meniń bilýimshe, tez arada túzetildi. Biraq, ekinshi jaǵynan, múmkin ony ádeıi julyp alǵan bolýy múmkin (mindetti túrde vıdeo avtory emes)? Osyǵan oraı, obektiniń búlinýi mundaı árekettiń moraldyq jaǵyn aıtpaǵanda, zańmen belgilengen jaýapkershilik qarastyrylǵanyn eske salamyz», - dedi Alekseı Ivjenko.

Sáýletshiler memorıal qysta salynǵanyn, sondyqtan tóseý men ornatýda kemshilikter bolýy múmkin ekenin atap ótti.

«Qalaı bolǵanda da, biz sáýlettik qadaǵalaýdy júzege asyramyz jáne merdiger-qurylysshynyń kepildik mindettemeleri aıasynda barlyǵy qazir tez arada joıyldy. Beınejazbadaǵy taqtaıshalar qalpyna keltirildi, synǵan taqtaıshalar aýystyrylyp jatyr», - dep túsindirdi Alekseı Ivjenko.

Eske salaıyq, 23 jeltoqsan kúni Memleket basshysy Qasym-Jomart Toqaev Almatyda Qańtar oqıǵasyna arnalǵan memorıaldy ashty.

Foto: t.me/azattyq