Taǵy birneshe mınıstrlikke jemqorlyqqa qatysty taldaý júrgiziledi

NUR-SULTAN. QazAqparat – Jemqorlyq táýekelderine júrgizilgen taldaý jumystary jaıly elordada ótken baspasóz máslıhatynda QR Sybaılas jemqorlyqqa qarsy is-qımyl agenttiginiń aldyn alý departamentiniń basshysy Anar Jarova aıtyp berdi, dep habarlaıdy QazAqparat tilshisi.

Jyl basynan beri taldaý jumystary atap aıtqanda, Eńbek jáne halyqty áleýmettik qorǵaý mınıstrligine, «QazAvtoJol» AQ» Ulttyq kompanııasyna, Densaýlyq saqtaý mınıstrliginiń dári-dármek zattaryn saraptaý ulttyq ortalyǵyna, Aýyl sharýashylyǵy mınıstrliginiń veterınarlyq baqylaý jáne qadaǵalaý komıtetine, keden jelisi boıynsha Memlekettik kirister komıtetine jáne Ulttyq olımpıada komıtetine júrgizilgen.

«Alty birdeı taldaý jumysynyń úsheýi uıymdardyń ózinen túsken ótinim boıynsha qolǵa alyndy. Bul jaǵdaı qoǵamnyń jemqorlyq keseline degen kózqarasynyń ózgerip bara jatqanyn kórsetedi. Memlekettik organdardyń mundaı qyzyǵýshylyǵy vedomstvolyq múdde kózqarasynan alystaýǵa jol ashady», - dedi Anar Jarova.

Agenttik ókiliniń aıtýyna qaraǵanda, jemqorlyq jaǵdaılarynyń sharttary men sebepterin anyqtaý jáne olardy joıý baǵytynda naqty sharalar qolǵa alynýda.

«Osy jyldyń shilde aıynda úsh memlekettik organnyń jumysynda anyqtalǵan jemqorlyq táýekelderin qarap, taldadyq. Olar - Eńbek jáne halyqty áleýmettik qorǵaý, Indýstrııa jáne ınfraqurylymdyq damý jáne Aýyl sharýashylyǵy mınıstrlikteri. Taldaý jumysynan keıingi talqylaýdyń arqasynda jemqorlyq táýekelderin joıý baǵytyndaǵy keshendi sharalar qabyldanady», - dedi ol.

Anar Jarova sonymen qatar, taldaý jumystary aldaǵy ýaqytta qandaı organdar men uıymdarǵa júrgiziletinin de atady.

«Erteń biz jemqorlyq táýekelderine qatysty taldaýdy Ulttyq ekonomıka mınıstrliginiń memlekettik materıaldyq rezerv komıtetine, odan keıin Ekologııa mınıstrliginiń ekologııalyq retteý jáne qadaǵalaý komıtetine, «SK-Farmatsııa» JShS-ǵa, sonymen birge turǵyn úı qurylysy salasyna júrgizemiz. Taldaý ortalyqpen birge óńirlerde de qolǵa alynady», - dedi agenttik ókili.