Taekvondodan álem chempıonatynda Qazaqstan quramasy júldege ilige almady

BAKÝ. QazAqparat - Ázerbaıjan astanasy Bakýde taekvondodan 26-shy álem chempıonaty aıaqtaldy. Daıangqa shyqqan ulttyq qurama sportshysy Azıza Qarajanova (53 kg) men Rýslan Japarov (+87 kg) 3-aınalymda súrinip, júldege qol jetkize almady, dep habarlaıdy QazAqparat sportty damytý dırektsııasyna silteme jasap.

Azıza alǵashqy aıqasta kıprlyq Nagııa Kaýtıshıdy, sosyn brazılııalyq Larısa Nasımento Rossı Santosty utty.

Alaıda 2018 jylǵy Azııa oıyndarynyń jeńimpazy, taıbeılik Poıa Sýǵa 2 raýndta jol berdi. Búgin Poıa 2-qazaqstandyq taekvondoshydan aılasyn asyrdy.

Ol sary qurlyq Olımpıadasynda top jarǵanda jartylaı fınalda Farıza Aldońǵarovany jeńgen.

«Qytaılyq sportshymen birneshe aı buryn Aýstrııa ashyq chempıonatynda kezdesip, 2-0 esebimen jeńgenmin. Búgin qaı jańynan kem túskenimdi bilmeımin. Úıge barǵan soń ketken qatelikterdi taldap, taǵy qaıtalanbas úshin jumys isteýim kerek»,-dedi Azıza jekpe-jekten keıin.

Básekeni 2-aınalymnan bastaǵan asa aýyr salmaqtaǵy Rýslan Japarov pákistandyq Hamza Omar Saıdtan basym túsken.

Osydan keıin tarysty ótken aıqasta túrkııalyq Emre Kýtalmysh Ateshlıdiń myqty ekenin moıyndady.

«Túrik sportshysymen osyǵan deıin 2 márte jolyǵyp, senimdi utqanmyn. Fızıkalyq daıyndyǵym jaqsy boldy. Tek alǵashqy raýndta bosańsyp, basyma birneshe soqqy tıgizip aldym. Sosyn, tarazy basyn teńestirdim. Biraq sońǵy raýndta 6-7 esebimen ese jiberdim. Jalpy alǵanda bul álem chempıonatyna daıyndyǵymyz jaqsy edi. Qalaı jeńilip qalǵanymdy qazir túsindirip aıta almaımyn»,-dedi Rýslan Japarov.

Qazaqstan quramasynyń bas bapkeri Batyrbek Esdáýletov osy chempıonatta negizgi senim tájirıbeli taekvondoshylarǵa artylǵanyn jetkizdi.

«Ókinishke qaraı, osy aptada bizge medal alýdyń sáti túspedi. Úsh sportshymyz júldege bir taban jetpeı jeńildi. Bári jaqsy daıyndalyp keldi. Dese de áli bul baǵyttaǵy jumysty jalǵastyrýymyz qajet. Quramaǵa 20 jasqa deıingi biraz jas sportshy qosylǵanyn bilesizder. Bakýde tájirıbeli taekvondoshylardan medal kúttik. Oılaǵanymyz bolmady. Qate ózimizden. Osy jarysqa kelýimizge Mádenıet jáne sport mınıstrligi, onyń ishinde Sportty damytý dırektsııasy bar jaǵdaıdy jasady. Óz basym endi kelgen jas sportshylarǵa senemin. Durys jumys istesek, olar úlken jeńiske jete alady»,-dedi ol SDD baspasóz qyzmetine bergen suhbatynda.

Jalpy bıylǵy dodaǵa 145 elden myńǵa tarta taekvondoshy jınaldy.

Bıylǵy doda Halyqaralyq taekvondo federatsıasynyń 50 jyldyǵymen tuspa-tus kelip tur. Munda Parıj Olımpıadasyna qajet upaılar sarapqa salyndy.

Ár salmaqtaǵy álem chempıondary 140 ball alsa, kúmis júlde úshin 84, qolaǵa 50 upaı berildi.

Qazaqstan byltyr Meksıkada bolǵan álem chempıonatynda da júldege qol jetkize almaǵan.