Tabysy tómen azamattardy kiris salyǵynan bosatý usynyldy
Qazaqstannyń kommýnıstik halyq partııasynyń (QKHP) Aqmola oblystyq fılıaly uıymdastyrǵan sharaǵa jergilikti kásipkerler, memlekettik kirister basqarmasynyń, «Atameken» ulttyq kásipkerler platasynyń oblystyq fılıaly, Kókshetaý qalalyq kásipkerlik bólimi ókilderi jáne ózin-ózi jumyspen qamtyp otyrǵan azamattar qatysty.
«Ózin-ózi jumyspen qamtyp otyrǵandarǵa memlekettiń nazary qajet. Memleket olarǵa úlken kóńil bólse, onda ózin ózi jumyspen qamtyp otyrǵan qanshama adamnyń jaǵdaıy durystalar edi. Ol úshin eń bastysy, tabysy tómen azamattardy kiris salǵynan bosatý kerek. Esesine bul júktemeni iri kásiporyndarǵa aýdarý kerek. Ekinshiden ózin ózi jumyspen qamtyp otyrǵandarǵa áleýmettik baspaldaq usynyp, bilimderin jetildirýge kómektesý qajet. Halyq kommýnısteri azamattarǵa salyq tóleýde teń múmkindik jasalýy tıis dep esepteıdi», - dep atap ótti partııanyń oblystyq fılıalynyń tóraǵasy Oljas Turǵynov.
Sonymen qatar, jıynda Kókshetaý qalalyq kásipkerlik bóliminiń basshysy Andreı Podgýrskıı, qalalyq memlekettik kirister basqarmasynyń bólim basshysy Láılá Smaǵulova, qalalyq jumyspen qamtý ortalyǵynyń mamany Sandýǵash Aldabergenov, «Atameken» ulttyq kásipkerler platasynyń oblystyq fılıaly basshysynyń orynbasary Erqanat Musylmanbek jáne Zerendi baǵytyndaǵy baqtashylar seriktestigi qaýymdastyǵynyń tóraǵasy Nıkolaı Lohmaı sóz alyp, azamttardyń ózin ózi jumyspen qamtý baǵytynda oryn alyp otyrǵan túıitkildi máselelerdi ortaǵa saldy jáne ony sheshý jolynda qolǵa alynǵan memlekettik baǵdarlamalardyń múmkindikterin túsindirip berdi.