Tabysy qaıyrymdylyqqa jumsalady: Qaraǵandyda erekshe shashtaraz ashyldy

QARAǴANDY. QazAqparat –«Hareket» respýblıkalyq qory Qaraǵandyda erlerge arnalǵan sulýlyq salonyn ashty. Salonnyń barlyq tabysy qaıyrymdylyqqa ketedi. Túsken qarajatqa az qamtylǵan jáne kópbalaly otbasylar úshin turǵyn úı satyp alynady, dep habarlaıdy QazAqparat tilshisi.

«Hareket» qory Qaraǵandy fılıalynyń dırektory Aqtoty Júnisovanyń aıtýynsha, barbershop demeýshilik kómektiń arqasynda ashylǵan.

«Demeýshi óz esimin ataǵysy kelmeıdi. Ol Ońtústik-Shyǵys shaǵynaýdanynda úı-jaı alyp, qajetti jabdyqty satyp aldy. Alty sheber jumys isteıtin bolady. Ázirge bir barber jumys istep jatyr», – dedi Aqtoty Júnisova.

Salonda tek er adamdarǵa – eresekterge jáne balalarǵa qyzmet kórsetiledi. Árbir shash qııý aqysy qaıyrymdylyq retinde qarastyrylady. Jınalǵan qarajatqa turǵyn úıge muqtaj adamdarǵa: kópbalaly otbasylarǵa, múgedekterge, jalǵyzbasty analarǵa, jetim balalarǵa baspana satyp alynady.

Qor jýyrda keń páterdiń kiltin Temirtaý qalasynyń turǵyny Aqerke Berekbaevaǵa tabys etti. Birinshi toptaǵy múgedek áıel úsh bala tárbıelep otyr.

«Hareket» qaıyrymdylyq qory 2017 jyly qurylǵan. Búgingi tańda uıym búkil Qazaqstan boıynsha otbasylar úshin 503 páter satyp aldy, onyń ishinde 87-i qaraǵandylyqtar. Qor týraly qosymsha aqparatty Instagram áleýmettik jelisinen bilýge bolady: @xareket_qory_official.