Tabysqa jetken sheteldegi qandastar týraly arnaıy telejoba bastalady
«Shynynda da, quryltaıdyń kún tártibi óte tyǵyz ári qyzyqty. Uıymdastyrýshylyq sıpattaǵy birqatar máselelerdi sheshý jumysy tur. Olar eń aldymen, baılanystardy nyǵaıtyp, álemniń túkpir-túkpirindegi dıasporalardyń «Otandastar» qorymen, Dúnıejúzilik qazaqtar qaýymdastyǵymen qarym-qatynasyn kúsheıtýge baǵyttalǵan. Ol jerde bizdiń sheteldegi otandastarymyzdy qoldaýǵa baǵyttalǵan zańnamalyq bastamalar talqylanyp, bilim jáne týrıstik saladaǵy baǵdarlamalar júzege asyrylatyn bolady. Qazaq tiliniń qoldanys aıasyn keńeıtý máselesi qaýzalady. Bıznes-jobalardy iske asyrý máselesi kóteriledi», - dedi Dáýren Abaev Habar arnasyndaǵy «Ashyq dıalog» baǵdarlamasynda.
Mınıstr sonymen qatar sheteldegi qazaq jastary úshin qazaqstandyq Joǵarǵy oqý oryndarynyń kórmesi uıymdastyrylatynyn aıtyp ótti.
«Tuńǵysh ret kishi quryltaı aıasynda otandyq jáne sheteldik bıznesmenderdiń qatysýymen bıznes-forým ótedi. Sondaı-aq, qazaq dıasporasy ókilderiniń tabysqa jetý joldary týraly telejoba bastaǵaly otyrmyz. Joǵary jetistikterge jetken qandastarymyz kóp. Olardyń ómiri shynynda da, jiger beredi. Máselen, Nazarbaev Ýnıversıtetinde ǵylym doktory, professor Dórbóthan Suraǵan atty azamat jumys isteıdi. Kezinde Mońǵolııada mal baǵyp, qazaqy ortada ósken ol úshin mektepke (mońǵol tilindegi mektepke) barý qıynǵa túsken. 2005 jyly ol tarıhı otanyna oralyp, Ál-Farabı atyndaǵy QazUÝ-da bilim alǵan. Nıý-Iorktegi ýnıversıtette bilimin shyńdaǵan. Londondaǵy Patshaıymdyq kolledjinen magıstr dárejesin alǵan. Al búgin ol álemniń eń tabysty matematıkteriniń birine aınaldy. Osyndaı azamattardyń ómirin kópshilik bilýi kerek», - dedi Dáýren Abaev.
Eske sala ketsek, 2019 jyldyń 7-9 maýsymda Germanııa Federatıvtik Respýblıkasynyń Mıýnhen qalasynda dúnıejúzi qazaqtarynyń kishi quryltaıy ótetinin buǵan deıin habarlaǵan bolatynbyz.