Tabıǵı aýmaqtarda órtti erte anyqtaý júıesin engizýge 4,1 mlrd teńge bólindi
«Órtti erte anyqtaý júıesin engizýge 4,1 mlrd teńge qarastyrylǵan. Osy baǵytty qarjylandyrý 2027 jylǵa qaraı erekshe qorǵalatyn tabıǵı aýmaqtardyń jalpy terrıtorııasynyń 15 paıyzyn qamtýǵa múmkindik beredi», - dep baıandady búgin Zúlfııa Súleımenova Úkimet otyrysynda.
Budan basqa, mınıstr 1 shildeden bastap orman qorǵaý mekemeleri qyzmetkerleriniń jalaqysy ósetinin atap ótti.
«Orman qorǵaý mekemeleri jumyskerleriniń jalaqysy laýazymdyq jalaqydan 100% artady. Atap aıtqanda, atqaratyn laýazymyna baılanysty ortasha 101 myńnan 320 myń teńgege deıin ósedi», - dep toqtaldy ol.
Sonymen qatar, Zúlfııa Súleımenova tabıǵatty qorǵaý mekemeleriniń materıaldyq-tehnıkalyq bazasyn jetildirýge 8,2 mlrd teńge bólingenin aıtty.
«2023 jyly respýblıkalyq bıýdjetti naqtylaý kezinde Azamattyq qorǵaý salasyndaǵy 2023-2027 jyldarǵa arnalǵan birinshi kezektegi sharalardyń keshendi jospary sheńberinde tabıǵatty qorǵaý mekemeleriniń materıaldyq-tehnıkalyq qamtamasyz etýge 8,2 mlrd teńge bólindi. Bul 2027 jylǵa qaraı jaraqtandyrýdy 100% deıin jetkizýge múmkindik beredi. Aǵymdaǵy jyly qamyspen jabylǵan, ótýge múmkin emes batpaqty jerlerde órt sóndirý úshin batpaqta júretin arnaıy kólik pen shalǵy alý qarastyrylýda», - dep málim etti vedomstvo basshysy.
Qosa ketsek, buǵan deıin Zúlfııa Súleımenova ákimdikter ıesiz janýarlarǵa arnalǵan ortalyqtar salýǵa jetkilikti qarajat bólmeıtinin aıtqan bolatyn.
Buǵan qosa, Kaspıı teńizi jaǵalaýynda qyrylǵan ıtbalyqtardyń ólimine ne sebep bolýy múmkin ekenin málim etti.