Tabıǵat paıdalanýshy qorshaǵan ortany bastapqy qalpyna keltirýge mindetteledi - mınıstr

NUR-SULTAN. QazAqparat – Ekologııaǵa zalal keltirilse, tabıǵat paıdalanýshy qorshaǵan ortany bastapqy qalpyna keltirýge mindetti bolady. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev málim etti, dep habarlaıdy QazAqparat tilshisi.

«Tabıǵatty paıdalanýdyń qoldanystaǵy ekonomıkalyq tetigi (tólem júıesi ári olardy josparlaý) tabıǵat paıdalanýshylardy qorshaǵan ortanyń lastaný deńgeıin tómendetýge yntalandyrmaıdy. Osyǵan baılanysty, Kodeks jobasynda 1972 jyly Ekonomıkalyq yntymaqtastyq jáne damý uıymy sarapshylary tujyrymdaǵan «lastaýshy tóleıdi» prıntsıpi usynyldy», - dedi mınıstr Májiliste jańa Ekologııalyq kodeks jobasyn tanystyra otyryp.

Onyń sózine qaraǵanda, bul prıntsıp lastanýdyń aldyn alýdy jáne baqylaý sharalaryn, sondaı-aq qorshaǵan ortaǵa keltirilgen zalaldy qalpyna keltirý úshin jaýapkershilikti kúsheıtedi.

«Osylaısha, tabıǵatty paıdalanýshylarǵa ekologııalyq aıyppuldar tólegenshe, qorshaǵan ortaǵa keri áser etýge jol bermeıtin sharalardy qabyldaý tıimdi bolatyndaı jaǵdaılar jasalady. Ekologııalyq zııan anyqtalǵan jaǵdaıda tabıǵat paıdalanýshy qorshaǵan ortany bastapqy qalpyna keltirýge mindetti bolady», - dep túıindedi Myrzaǵalıev.