T.Súleımenov memlekettik menshik nysandaryn jekeshelendirýden túsetin tabys kólemin atady

ASTANA. QazAqparat - Memlekettik menshikti jekeshelendirý men aktıvterdi satýdan túsetin boljamdy tabys 4-7 mlrd. AQSh dollaryn quraıdy. Bul týraly búgin Úkimet otyrysynda memlekettik nysandardy jekeshelendirý máselesine qatysty baıandama jasaǵan QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«Memleket basshysy Qazaqstan Respýblıkasy Úkimetiniń 2016 jylǵy 10 aqpanda ótken keńeıtilgen otyrysynda jekeshelendirýden túsken qarajatty Ulttyq qorǵa jiberý sharalaryn qabyldaýdy tapsyrǵan edi. Atalǵan tapsyrmany oryndaý úshin «Qazaqstan Respýblıkasynyń keıbir zańnamalyq aktilerine jergilikti ózin-ózi basqarýdy damytý máseleleri boıynsha ózgerister men tolyqtyrýlar engizý týraly» QR Zań jobasy aıasynda Bıýdjettik kodekspen «Memlekettik múlik týraly» QR Zańyna sáıkesinshe túzetýler engizildi. Ol QR Parlament Senaty tarapynan qoldaýǵa ıe boldy. Qazir qujat qol qoıý protsesinde», - dedi mınıstr.

Onyń aıtýynsha, ulttyq basqarýshy holdıngter quramyna kiretin memlekettik menshikti jekeshelendirý men aktıvterdi satýdan túsetin boljamdy tabys 4-7 mlrd. AQSh dollaryn quraıdy. Túsim mólsheri saýda nátıjesine baılanysty bolmaq.

«Investorlar negizinen «Samruq-Qazyna» qorynyń iri 47 aktıvine qyzyǵýshylyq tanytýda. Onyń 7-eýi IPO/SPO arqyly satylady. Qordyń iri kompanııalarynyń IPO strategııasy boıynsha qabyldaǵan sheshimine sáıkes, IPO-dan túsetin túsim mólsheriniń boljamy 3,5 mlrd. AQSh dollarynan 5,5 mlrd. AQSh dollaryna deıin quraýy múmkin»,- dedi Súleımenov.