«Túrkistan» gazetiniń Atajurt jobasy tanystyryldy

NUR-SULTAN. QazAqparat – «Túrkistan» halyqaralyq gazetiniń «Atajurt» aıdaryn tanystyrý jáne alystaǵy aǵaıynmen rýhanı-mádenı, aqparattyq baılanys ornatý maqsatynda búgin sheteldegi qandastarymyzben onlaın konferentsııa ótti, dep habarlaıdy QazAqparat.

«Otandastar qory», Dúnıejúzi qazaqtarynyń qaýymdastyǵy jáne «Túrkistan» halyqaralyq gazeti birlese otyryp uıymdastyrǵan sharaǵa Shvetsııa, Túrkııa, Germanııa, Reseı, Ózbekstan, Tájikstan, Iran, Mońǵolııa jáne taǵy da basqa alys-jaqyn shet elderdegi qazaq mádenı uıymdary men ortalyqtarynyń basshylary, dıaspora ókilderi qatysty.

QR Aqparat jáne qoǵamdyq damý mınıstrligi Etnosaralyq qatynastardy damytý komıteti tóraǵasynyń orynbasary Erkin Úısinbaev, QR Syrtqy ister mınıstrligi Konsýldyq qyzmet departamenti qazaq dıasporasymen jumys isteý basqarmasynyń basshysy Muhtar Káribaı, «Otandastar qory» vıtse-prezıdenti Maǵaýııa Sarbasov, «Túrkistan» halyqaralyq gazetiniń bas redaktory Qýat Áýesbaı sóz sóılep, pikirlerin bildirdi.

Qandastarymyz aldaǵy ýaqytta gazet ujymymen tyǵyz baılanys ornatyp, aqparat almasýǵa múmkindik týǵanyna qýanyshty ekenderin aıtyp, atamekenderine, qandastarǵa degen lebizderin jetkizdi. Gazettiń jumysyna tabys tilep, pikirlerimen bólisti.

Alys-jaqyn shet eldegi jáne elge oralǵan qandastardyń tynys-tirshiligin tanystyrý maqsatynda ashylǵan «Atajurt» jobasy 1 jylǵa jýyq ýaqyt boıy otandastardyń jetistikterin jarııalap, túrli máseleleriniń sheshilýine atsalysyp keledi. Joba ári qaraı da jalǵasyn tappaq.