T.Musabaev jańadan qurylǵan «Ǵaryshty damytý ınstıtýty» qoǵamdyq birlestiginiń prezıdenti bolyp saılandy

ASTANA. 5 shilde. QazAqparat - Astana qalalyq Ádilet departamenti jańa qoǵamdyq birlestik - «Ǵaryshty damytý ınstıtýtyn» tirkedi.

Bizdiń agenttikke Qazaqstan Respýblıkasynyń ǵaryshker-synaýshysy, atalmysh uıymdy qurýdyń bastamashysy Aıdyn Aıymbetov málim etkendeı, «Ǵaryshty damytý ınstıtýty» (ǴDI) jeke tulǵalardy erikti túrde biriktiretin kommertsııalyq emes uıym bolyp tabylady. ǴDI QB-nyń basty mindeti - Qazaqstan Respýblıkasynda ǵarysh salasyn qalyptastyrýda memlekettik saıasatty júzege asyrýǵa belsendi qolǵabys etý.

Qoǵamdyq birlestik músheleriniń biraýyzdan qabyldaǵan sheshimimen ǴDI-diń qurmetti prezıdenti bolyp Qazǵarysh basshysy Talǵat Musabaev saılandy.

ǴDI QB músheleri ǵaryshtyq, bilim berý jobalary men baǵdarlamalaryn ázirleýge jáne iske asyrýǵa qatysýdy, ǵarysh salasyndaǵy kadrlyq áleýetti damytýǵa, ǵarysh qyzmetiniń jetistikterin nasıhattaýǵa, qoǵamdyq pikirdi qalyptastyrýǵa septesýdi kózdep otyr.

«Ǵaryshty damytý ınstıtýty» sondaı-aq óziniń marapattaryn taǵaıyndap, ázirleýge nıetti.