T. Musabaev: Qulaǵan «Proton-M» zymyran tasyǵyshynyń keltirgen zalalyn óteý daýy eshqashan toqtamaıdy
Bul týraly búgin QR Parlamenti Senatynyń jalpy otyrysynda Aeroǵarysh komıtetiniń tóraǵasy Talǵat Musabaev málim etti.
"Protonnyń" qulaýyna baılanysty Reseıdiń ótemaqy tóleý máselesi jóninde. Daý áli bitken joq, menińshe ol eshqashan bitpeıdi de. Negizi bul bizdiń komıtettiń, bizdiń mınıstrliktiń emes, Energetıka mınıstrliginiń quzyry. Onda tabıǵatty qorǵaý komıteti bar, olar zalal mólsherin anyqtady. Bizge túsiniksiz ózderiniń izdeýleri men zertteýleri boıynsha 14 mlrd. teńge dep qorytyndylapty. Shynyna kelsek, eger zalal shyǵynyn esepteýge múmkindik beretin birlesken erejeler nemese qujat qabyldanbasa, bul másele eshqashan sheshimin tappaıdy", - dedi ol depýtattardyń saýalyna bergen jaýabynda.
Onyń aıtýynsha, mundaı birlesken qujatty qazir eki eldiń mamandary daıyndaýǵa kirisken. "Qazirgi ýaqytta mundaı qujat RF-pen birge jasalyp jatyr, meniń bilýimshe", - dep túıdi T. Musabaev.
Eske sala keteıik, 2013 jyly 2 shilde aıynda «Proton-M» zymyran tasyǵyshy Baıqońyr aılaǵynda start kezinde jerge qulaǵan bolatyn. Qazaqstan Reseı tarapyna onyń zalalyn óteýge 90 mln. dollar shamasynda ótemaqy kólemin belgilegen. Keıin Roskosmos óziniń táýelsiz esepteýlerin júrgizedi dep málimdedi.
Zymyran tasyǵyshynyń bortynda 600 tonna geptıl, amıl men kerosın boldy.