Syrym Sháriphanov shahtadaǵy órtti sóndirý jumystary jaıynda túsinik berdi

ASTANA. QazAqparat – Tótenshe jaǵdaılar mınıstri Syrym Sháriphanov Qazaqstan shahtasyndaǵy órtti sóndirý qıynǵa túsip jatqanyn aıtty, dep habarlaıdy QazAqparat tilshisi.

«Shahtaǵa qatysty aıtsaq, ol jerde transporterlik lenta janǵan. Osynyń saldarynan ot sol jerdegi kómirge túsken, sondyqtan ol uzaq ýaqyt boıy janady. Órtti sóndirý qıynǵa túsip jatyr. Ol jerde qutqarýshylardyń tynys alýyna qıyn bolyp tur jáne kórý múmkindigi shekteýli. Ol jerde temperatýra da tym joǵary. Shahtada órt sóndirý óte qıyn ekenin bilesizder. Sondyqtan tıisti tehnologııalardy eskere otyryp, jumysty oryndaý qajet», - dedi S. Sháriphanov Úkimette tilshiler suraǵyna jaýap bere otyryp.

Sonymen qatar mınıstr órt naqty qashan sóndiriletinin aıta almady.

«Boljam aıta almaımyz. Meniń oıymsha, jaqyn aradf órtti aýyzdyqtaımyz», - dedi vedomstvo basshysy.

Eske salsaq, Qaraǵandy oblysyndaǵy «Qazaqstan» shahtasynda órt 17 tamyz kúni saǵat 10:05-te tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

Shahtanyń astynda qalyp qoıǵan besinshi kenshiniń denesi tabyldy.

18 tamyzdaǵy jaǵdaı boıynsha medıtsına mekemelerinde órtten zardap shekken 11 kenshi em qabyldap jatty.

Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov málim etkendeı, «Qazaqstan» shahtasyndaǵy apat úshin jaýapty tulǵa 7 jylǵa deıin túrmege qamalýy múmkin.