Syrym Sháriphanov qolastyndaǵylardyń jemqorlyqpen ustalýy jaıynda: Áshkereleýge biz de kómektestik

SEMEI. QazAqparat – QR Tótenshe jaǵdaılar mınıstri Syrym Sháriphanov Órtke qarsy qyzmet komıtetiniń tóraǵasy men eki óńirdegi TJD bastyǵynyń para aldy degen kúdikpen ustalýyna jaýap berdi, dep habarlaıdy QazAqparat tilshisi.

«Bul faktiler mınıstrlik pen Antıkordyń birlesken jumysynyń arqasynda anyqtaldy. Qazir tergeý amaldary júrgizilip jatyr. Tergeý aıaqtalǵan soń tıisti sheshim shyǵady», - dedi mınıstr.

Buǵan deıin habarlanǵandaı, jasyryn júrgizilgen is-sharalardyń nátıjesi boıynsha TJM Órtke qarsy qyzmet komıtetiniń tóraǵasy, Shymkent qalasy men Jetisý oblysy boıynsha TJD bastyqtary paraqorlyqpen áshkerelengen.

Olar órtke qarsy qaýipsizdik salasyndaǵy qamqorlyǵy úshin kásipkerlerden júıeli negizde para alyp, tekseriletin uıymdardy kelisimshart jasaý arqyly olardyń qyzmetterin satyp alýǵa jáne ýaqtyly aqy tóleýge májbúrlegen dep kúdiktenedi.

Para somasy - 100 myńnan 4 mln teńgege deıin.

Budan basqa, TJM órtke qarsy qyzmet komıtetiniń tóraǵasy zańsyz aqshalaı syıaqy úshin Ulytaý oblysy boıynsha TJD basshylarynyń birine qamqorshylyq jasaǵan. Kúdiktiler ustalyp, ızolıatorǵa qamaldy.