«Syrttan ákelinetin ónimder sapasy kúmándi» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 15 sáýir, sársenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

«Egemen Qazaqstan» gazetiniń jazýynsha, Keshe Ortalyq kommýnıkatsııalar qyzmetinde Ulttyq ekonomıka mınıstrligi Tutynýshylardyń quqyqtaryn qorǵaý komıtetiniń tóraǵasy Álıaqpar Mátishev baspasóz máslıhatyn ótkizdi. Onda ishki naryqtaǵy taǵam ónimderiniń qaýipsizdigi sóz boldy. Spıkerdiń sózine qaraǵanda, qazirgi ýaqytta tamaq ónimderin tutynýshy el azamattary alar azyq-túlik taýarlaryna óte muqııat bolǵany jón. Áıtpese, ańǵal adam kez kelgen ýaqytta aldanyp qalýy bek yqtımal. Baspasóz máslıhatynda alynǵan aqparattarǵa qarap osylaı demeske lajymyz joq. «Ishki naryqtaǵy tamaq ónimderiniń qaýipsizdigin qamtamasyz etý maqsatynda osy jyldyń naýryz aıynyń basynan beri komıtettiń aýmaqtyq departamentteri bólshek saýdadaǵy ónimderdiń synamalaryn aldy. Úlken saýda ortalyqtary men dúkenderden bir myńnan astam synama alynyp, muqııat zertteldi. Bul jumystar búgingi kúnde de jalǵasyn taýyp jatyr. Naqty aıtqanda, saý­da sórelerindegi ónimderdiń birneshe tobyna zertteý jumystary júrgizilýde. Ná­tıjesinde, Reseıden ákelingen qus etiniń 5 tonnadan astamy mıkro­bıo­logııalyq kórsetkishterge saı kelme­gendikten saýda sórelerinen alyp tastalyndy. Salmonella tabylǵan ónimderdiń bir tonnasy múlde joıyldy», - dedi Á.Mátishev. Osy jaıynda «Syrttan ákelinetin ónimder sapasy kúmándi» atty maqaladan tolyq oqı alasyzdar

Bas basylymda «Akkredıtteý áli jalǵasady» degen maqala kópshilik nazaryna usynyldy. Saılaý barysyn baıqaýǵa kelgen sheteldik baıqaýshylardy tirkeý áli de jalǵasýda. Osyǵan oraı keshe Ortalyq saılaý komıssııasynyń otyrysy ótip, onda «2015 jylǵy 26 sáýirge taǵaıyndalǵan Qazaqstan Respýblıkasy Prezıdentiniń kezekten tys saılaýyna shet memleketter men halyqaralyq uıymnyń baıqaýshylaryn akkredıtteý týraly» qaýly qabyldandy. Jalpy aıtqanda, shet memleketterdiń, halyqaralyq uıymdardyń baıqaýshylary men sheteldik BAQ-tardyń ókilderin qosqanda barlyǵy 630 adam akkredıtteýden ótken.

***

«Aıqyn» gazetiniń jazýynsha, Qazaqstanda dári-dármektiń qymbattaýyna jol berilmeıdi. Densaýlyq saqtaý jáne áleýmettik damý mınıstrligi osyǵan ýáde etedi. Osy oraıda atalǵan ve­domstvonyń Medıtsınalyq jáne farmatsevtıkalyq qyzmetti baqylaý komıtetiniń departamentteri, Qazaqstannyń barlyq oblystarynda jáne Astana men Almaty qalalarynda ákimdiktermen, farmatsevtıkalyq qaýymdastyqtarmen birlesip, «Dárilik zattar men medıtsınalyq maqsattaǵy buıymdardyń baǵasyn ustap turý» boıynsha arnaıy memorandýmdarǵa qol qoıdy.

Osy qujattarǵa sáıkes, Den­saýlyq saqtaý jáne áleý­mettik damý mınıstrligi men kásibı farmatsevtıkalyq qaýymdas­tyqtar 200 túrli áleýmettik asa mańyzdy ári kóbirek suranysqa ıe 200 ataýly dárilik zattar men medıtsınalyq maqsattaǵy bu­ıymdardyń baǵasyn qymbat­tatpaı, ustap turmaq. Osylaısha, memleket halyq­tyń áleýmettik osal, tıisinshe, jıirek syrqattanatyn toptaryn qoldaýǵa nıetti. Bul rette dárilik zattar men medıtsınalyq maq­sat­taǵy buıymdardyń otandyq jáne halyqaralyq óndirýshileri, dıstrıbıýtorlar jáne bólshek saýda jelileriniń ókilderi 2015 jylǵy 1 naýryzdaǵy baǵa deń­geıinde turaqtaıtyn bolady. Bul materıal «Dári-dármektiń baǵasy retteledi» degen taqaryppen basyldy.

Osy basylymda «Shegirtkeler bas kótere bastady» degen maqala jarııalandy. Egin egý jumystary erte bastalatyn ońtústik óńirde, dálirek aıtqanda Saryaǵash aýdanynda shegirtke «oıanyp» jatyr. Endi olardy birer aptada ýlap úlgermese, tez-aq ósip-jetilip, kúsh alyp ketýi múmkin eken.

Sol sebepti Aýyl sharýashylyǵy mınıstrligi shegirtkemen kúresti erte bastaý nıetimen pestıtsıdterdi usynýshylar, olardy saqtaý, tasymaldaý jumystaryn oryndaýshylar men óńdeý jumystaryn júrgizýshiler arasynda tender ótkizip, shart jasaýda. Bir aıta keterligi, pestıtsıdter menshik túrine qaramastan, barlyq sharýashylyqtarǵa tegin beriledi. Osy maqsatta respýblıkalyq bıýdjetten 3,7 mlrd. teńge bólinipti, sonyń ishinde pestıtsıdter satyp alýǵa - 721 mln. teńge jáne hımııalyq óńdeý júrgizýge 3 mlrd. teńge qarastyrylǵan. Bul týraly AShM-da ótken brıfıngte aıtyldy.

***

«Vremıa» gazetindegi «Hrabretsam - skıdka!» atty materıalda aqtóbelik joǵary oqý oryndarynyń biri áıel azamatshany tonaýshylardan qutqarǵan ózderiniń eki stýdentine bilim ordasynda oqýǵa 10 paıyzdyq jeńildik usynǵandyǵy jazylady

Qanat Shúrenov pen Eset Kenjeǵulov Abaı saıabaǵynda kómekke shaqyrǵan áıeldiń daýysyn estip, jas jigittiń atalǵan azamatshanyń qolynan sómkesin julyp alyp, qasha jónelgenin baıqap qalady.

Stýdentter qaskóıge jetip alyp, ony polıtseıler kelgenshe ustap turǵan kórinedi. Keıin belgili bolǵandaı, áıeldiń sómkesinde qujattarmen qatar, 1,6 mln. teńge kóleminde aqsha bolǵan eken.