Syrtqy valıýta naryǵynda birqatar mańyzdy oqıǵalar boldy - Ulttyq bank

ASTANA. QazAqparat – Qazaqstan Ulttyq banki 7-14 shilde aralyǵyndaǵy jekelegen damýshy elderdiń valıýtalaryna sholý jasady, dep habarlaıdy QazAqparat.

Ulttyq bank málimetinshe, 7-14 shilde aralyǵynda syrtqy valıýta naryǵynda birqatar mańyzdy oqıǵalar boldy. Mysaly, AQSh Eńbek statıstıkasy bıýrosynyń derekteri boıynsha maýsymda jyldyq ınflıatsııa 3%-ǵa deıin baıaýlaǵan. Bul – 2021 jylǵy naýryzdan bergi eń baıaý qarqyn. Osyǵan baılanysty DXY AQSh dollarynyń ındeksi 2,3%-ǵa álsirep, bir jyldan astam ýaqyt ishinde eń tómengi deńgeıge jetti. Investorlar AQSh FRJ-dan paıyzdyq mólsherlemeni kelesi otyrysta 25 bazıstik tarmaqqa arttyrýyn kútedi. Bul rette maýsymdyq boljamdarǵa engizilgen ekinshi ósimniń yqtımaldyǵy azaıa tústi.

Bul faktorlar AQSh dollaryna qatysty damýshy naryqtar valıýtalarynyń oń dınamıkasyna alyp keldi. Ol kelesideı bolyp qalyptasty:

Ońtústik Afrıka randy AQSh-ta ınflıatsııaǵa qatysty derekterdiń kútilgennen tómen bolýy aıasynda 4%-ǵa (18,87-den 18,11-ge deıin) nyǵaıdy;

Meksıka pesosy sheteldik kapıtaldyń ákelinýi aıasynda 2,3%-ǵa (17,15-ten 16,75-ke deıin) nyǵaıdy. Mamyr aıynda ónerkásiptik óndiristiń ósýi kútkennen asyp túsip, j/j 3,9% boldy;

Brazılııa realy jahandyq táýekel sentımentiniń artýy aıasynda 1,6%-ǵa (4,87-den 4,79-ǵa deıin) nyǵaıdy;

Reseı rýbli energııa baǵasynyń ósýi jáne salyq kezeńiniń jaqyndaýy aıasynda 1,3%-ǵa (91,25-ten 90,06-ǵa deıin) nyǵaıdy;

Indonezııa rýpııasy AQSh FRJ monetarlyq saıasatyn qatańdatý tsıkliniń aıaqtalýyn kútý aıasynda 1,2%-ǵa (15143-ten 14959-ǵa deıin) nyǵaıdy;

Úndi rýpııasy AQSh dollarynyń álsireýi aıasynda 0,7%-ǵa (82,74-ten 82,17-ge deıin) nyǵaıdy;

Túrik lırasy ınflıatsııalyq kútýdiń artýy aıasynda 0,4%-ǵa (26,07-den 26,17-ge deıin) álsiredi.