Syrtqy saıasattaǵy ustamdylyq naqty tabystarǵa jol ashady -sarapshy
«Qazaqstan Prezıdenti Qasym-Jomart Toqaev 12 maýsymdaǵy ulyqtaý rásiminde 10 negizgi baǵytty belgilep, ony iske asyrýǵa dereý kirisýdi tapsyrǵan bolatyn. Olardyń qataryna halyqtyń tabysy men ál-aýqatyn arttyrý, sybaılas jemqorlyqqa qarsy tıimdi is-qımyl, sot-quqyqtyq reforma, ádil áleýmettik saıasat, turǵyn úı máselelerin sheshý, óńirlerdi damytý, teńdestirilgen jáne kópvektorly syrtqy saıasat, sondaı-aq jastardy qoldaý kirdi», - deıdi Georgıı Dýbovtsev.
Onyń oıynsha,eldiń syrtqy saıasattaǵy ustanymy ulttyq bızneske, árbir azamatqa naqty paıda ákelýi tıis.
«Teńgerimdi ári kópvektorly syrtqy saıasattyń arqasynda Qazaqstan álemde tanymal memleketke aınaldy. Jas memlekettiń BUU, EQYU, AÓSShK, ShYU, IYU jáne basqa da halyqaralyq uıymdardaǵy orny men róli jyl saıyn artyp keledi. Bul rette belsendi syrtqy saıası qyzmet pen kóp deńgeıli dıplomatııany júzege asyrý bizdiń memleketimizdiń ári qaraı ilgerileýiniń jáne ulttyq qaýipsizdikti qamtamasyz etýdiń mańyzdy faktory bolyp tabylady. Qazirgi jaǵdaıda halyqaralyq qatynastar júıesi túbegeıli jańaryp, qaýipsizdiktiń bazalyq qaǵıdalary aıtarlyqtaı ózgerip otyr», - dep deıdi sarapshy.
Onyń aıtýynsha, qazirgi halyqaralyq qatynas aıdynynda básekelestik artyp, keıbir memleketterdiń álemdik saıasatqa ústemdik ornatýǵa degen umtylysy kúsheıgen. Ondaı elder basqa memleketterdiń egemendigin aıtarlyqtaı shekteýge nıetti. Mundaı úrdis keıbir elderdiń derbes syrtqy saıası sheshimder qabyldaýyna múmkindik bermeı otyr.
«Birinshiden, álemge yqpal etý úshin ymyrasyz báseke júrip jatyr. Ol úshin áskerı múmkindikten bastap barlyq arsenal tarazyǵa túsýde. Ekinshiden, «Qyrǵı-qabaq soǵys» jyldarynan keıin qabyldanǵan barlyq halyqaralyq-quqyqtyq normalardan bas tartýǵa, óziniń ulttyq zańnamasyn halyqaralyq quqyqtan artyq qoıýǵa talpynyp jatqan elder bar. Úshinshiden, basqa elderdiń kez kelgen derbestigin basýǵa umtylys seziledi. Tórtinshiden, ózge memleketterge óz saıasatyn tańý úshin áskerı kúsh qoldanýǵa daıyn ekendikterin ashyq kórsetý beleń alyp barady», - dep tarazylaıdy ol.
Sarapshy halyqaralyq jaǵdaı shıelenisken tusta el basshylyǵy jan-jaqty saralanǵan saıasat ustanyp otyr degen pikirde. TMD, EO elderimen, Qytaımen, AQSh-pen jáne basqa da memlekettermen ózara qarym-qatynastarda teńgerimdi saqtaý Qazaqstannyń egemendigin nyǵaıtýǵa múmkindik ashpaq.
«Kópjaqty jáne eki jaqty formatta yntymaq aıasyn keńeıtý ustanymy kóptegen memlekettermen senimdi qarym-qatynas ornatýǵa yqpal etti. Bizdiń memleketimizdiń osyndaı salmaqty ustanymy aımaqtyq turaqtylyqty qamtamasyz etýge yqpal etip otyr», - dedi ol.
QSZI sarapshysynyń pikirinshe, jan-jaqty yntymaqqa baǵyttalǵan osyndaı syrtqy saıasattyń arqasynda Qazaqstan uzaq ýaqyt boıy qorǵanys shyǵyndarynan aıtarlyqtaı qarajatty únemdeı alady. Bul maqsattarǵa jalpy ishki ónimniń shamamen 1 paıyzyn ǵana bóle otyryp, únemdelgen qarajatty eldiń serpindi áleýmettik-ekonomıkalyq damýyna jumsaý múmkindigi bar.
«Azııanyń birqatar aımaqtarynda, onyń ishinde shekaralas elderde álemdik derjavalardyń múddeler qaqtyǵysy saqtalyp otyr. Óńirlik jáne jahandyq qaýipsizdiktiń jańa syn-qaterleri týyndaǵan jaǵdaıda olarǵa qarsy jedel shara qabyldaý talaby týyndaýy múmkin», - deıdi Georgıı Dýbovtsev.
«Prezıdent óziniń saılaýaldy baǵdarlamasyn júzege asyrý jónindegi is-qımyl josparyn arnaıy Jarlyqpen bekitti. Sol qujat aıasynda elimizdiń syrtqy saıasatynyń jańa tujyrymdamasyn qabyldaý kózdelgen. Jańartylǵan tujyrymdama Tuńǵysh Prezıdent - Elbasy Nursultan Nazarbaevtyń kópvektorly, teńgerimdi syrtqy saıasatyn jalǵastyrýdy qamtamasyz etýi tıis. ıAǵnı, bizdiń memleketimizdiń negizgi syrtqy saıası kúsh-jigeri ulttyq qaýipsizdikti, eldiń egemendigi men aýmaqtyq tutastyǵyn jan-jaqty qamtamasyz etýge, beıbitshilikti, óńirlik jáne jahandyq qaýipsizdikti nyǵaıtýǵa shoǵyrlanatyn bolady», - degen sarapshy syrtqy saıasattyń jańa tujyrymdamasy BUU, EQYU, ShYU jáne basqa da halyqaralyq uıymdardyń túrli qurylymdary men ınstıtýttarynda qazaqstandyq bastamalardy ilgeriletýge yqpal etetinin jetkizdi.