Syrqattanǵan turǵyndar Qadir túnin úıde kútkeni jón - DSM
«Búgin maýsymnyń 11-inen 12-sine qaraǵan túni Qazaqstannyń barsha musylmandary Qadir túnin ótkizý úshin meshitterge jınalady. Árbir musylman bul túndi meshitte qulshylyqpen ótkizgisi keledi. Bul ýaqytta meshitterge halyqtyń uzaq ýaqytqa jınalatynyn eskere otyryp, Densaýlyq saqtaý mınıstrligi barlyq senýshilerdi óz densaýlyǵyna muqııat bolýǵa keńes beredi. Ózin jaısyz sezinip, syrqattanyp qalǵan turǵyndardyń úıde qalǵany jón. Odan bólek, tamaqtyń qyzarýy, dene qyzýynyń kóterilýi, álsizdik syndy aýrýdyń alǵashqy belgileri baıqalǵan jaǵdaıda dárigerge kóriný kerek», - delingen QR Densaýlyq saqtaý mınıstrligi Qoǵamdyq densaýlyq saqtaý komıtetiniń baspasóz qyzmeti jibergen habarlamada.
Eske sala ketsek, buǵan deıin mınıstrlik respýblıkanyń barlyq óńirinde aýrýdyń aldyn alý boıynsha qaýyrt jelini iske qosqan bolatyn. Onda ınfektsıonıst jáne epıdemıolog dárigerler táýlik boıy jumys istep, telefon arqyly menıngıttiń aldyn alý boıynsha keńes beredi.
Mınıstrliktiń habarlaýynsha, 11 maýsymdaǵy menıngokokk ınfektsııasy jaǵdaıy turaqty jáne respýblıkada juqtyrý jaǵdaıy tirkelgen joq.