Syrdyń boıyndaǵy eldi mekenderge eshqandaı qaýip joq
Aǵymdaǵy jyly 21 aqpan men 4 naýryz aralyǵynda Qyzylorda qalasy men Syrdarııa, Jalaǵash, Janaqorǵan, Shıeli aýdandarynyń ózen boıyndaǵy eldi mekenderi aýmaǵynan seńniń qaýipsiz júrýin qadaǵalaýdyń nátıjesinde tótenshe jaǵdaısyz ótti.
Degenmen, sý ózen arnasynan asyp, Qarmaqshy aýdany, Qyzyltam eldimekeni tusyndaǵy Daldabaı, Qyzyltam jolynyń sý basý qaýpi bar aýmaǵyna sý jaıylǵan. Jolaýshylardyń qaýipsizdigi úshin oblystyq mańyzy bar «Jalaǵash-Josaly» baǵytyndaǵy (Josalydan 43 km, Jalaǵashtan beri 31 km, Daldabaı men Qyzyltam eldi mekenderiniń arasy) jol ýaqytsha jabyldy. Sý alý aımaqtaryndaǵy sharýashylyq ıeleriniń múlikterine, turǵyn jaı ǵımarattaryna t.b. zaqym kelmegen.
Eldimekenderge eshqandaı qaýip joq. Qazir jaýapty salalarmen arnaıy jumystar júrgizilip, jaǵdaı tolyq baqylaýǵa alynǵan.
Atalǵan jol - eki eldi mekendi baılanystyratyn jol ekenin eske salamyz. Qyzyltam, Qarmaqshy jáne Daldabaı eldi mekenine Jalaǵash aýdany jaǵynan baratyn ishki jol bar. Sol sebepten onyń úlken jol qatynasyna kedergi keltirmeıdi. Al, «Batys Eýropa-Batys Qytaı» halyqaralyq avtojoly ashyq, qalypty jumys jasaýda.
Aıta ketý kerek, 25 naýryzǵa deıin Aral aýdanynan muz tolyqtaı júrip ótetini boljanýda.
Búginde sý basý qaýpi bar aımaqtarǵa arnaıy tehnıka, kúsh-quraldary bar jaýapty mekemeler bekitildi (29 sý basý qaýipi bar aımaqqa 136 mekeme bekitilgen. Olarda 368 arnaıy tehnıka jáne 1 083 adam kúshi bar).
Sý tasqynyna qarsy materıaldyq-tehnıkalyq qorlar qajetti kólemde qalyptastyryldy. Yqtımal sý tasqyny kezeńinde halyqty kóshirý pýnktteri daıyn.
Sondaı-aq, tıisti sala mamandarymen («Qazgıdromet» jáne «Qazsýshar» RMK Qyzylorda fılıaldary) Syrdarııa ózeni arnasyndaǵy 10 sý beketteri men 4 sý toraptarynda sý deńgeıine kúndelikti monıtorıng júrgizilýde. Eldimekenderge eshqandaı qaýip joq ekendigin taǵy da nazarǵa salamyz.