«Syrdarııanyń sol jaǵalaýynda jańa qala salynatyn bolady» - baspasózge sholý
***
«Egemen Qazaqstan» basylymynyń jazýynsha, Syrtqy ister mınıstriniń orynbasary E.Ashyqbaev bastaǵan qazaqstandyq delegatsııa Paragvaı astanasy - Asýnsonda ótken Amerıka memleketteri uıymy 44-shi Bas assambleıasynyń jumysyna qatysty. Amerıka memleketteri uıymy - Amerıka kontınentiniń 35 memleketin biriktiretin iri aımaqtyq uıym. Qazaqstan 1996 jyldan beri onyń turaqty baqylaýshysy bolyp tabylady. Іs-sharanyń ashylý kúni qazaqstandyq delegatsııa basshysy Paragvaı Syrtqy ister mınıstriniń orynbasary F.Gonsalespen kezdesti. Áńgimelesýshi taraptar bizdiń elderimizdiń halyqaralyq kún tártibiniń, sonyń ishinde teńizge shyǵatyn joly joq memleketter tobymen birlesken jumys aıasyndaǵy birqatar máseleleri boıynsha ustanymdarymyzdyń jaqyndyǵyn rastady. Kelissózder qorytyndysy boıynsha E.Ashyqbaev pen F.Gonsales Saıası keńester ornatý týraly memorandýmǵa qol qoıyp, bizdiń elderimiz arasynda vızalyq rejimdi jeńildetý boıynsha kelisim jónindegi jumystardy bastaýǵa ýaǵdalasty. Bul maqala «Assambleıa alańyndaǵy kezdesýler» degen taqyryppen usynylyp otyr.
Osy basylymnyń jazýynsha, Qyzylordada qala salynady. Syrdarııanyń sol jaǵalaýyna. Búginde qala túsetin jerdiń asty-ústi tolyq zertteýden ótti. 90 myńǵa jýyq halyq syıatyn jańa shahardyń keskin-kelbeti de erekshe bolmaq. Onyń arhıtektýrasynda shyǵystyń shyraıly kelbeti de, qazaqy naqysh ta, zamanaýı tehnologııa da kórinis tabady. Qalany bastamas buryn, Syrdarııanyń arǵy beti men bergi shetin jalǵaıtyn kópir salý kerek. Mine, burnaǵy kúni sol kópirdiń qurylysy bastaldy. Oǵan oblys ákimi Qyrymbek Kósherbaev jáne Senat pen Májilistiń bir top depýtattary qatysty. Osy máseleni arqaý etken maqala «Syrdarııanyń sol jaǵalaýynda jańa qala salynatyn bolady» degen taqyryppen berilgen.
***
«Álemde «aqaýly valıýta» sanalatyn dollardan ketýdiń áralýan jolyn eýropalyq qaýymdastyq ta qarastyryp jatqandaı. Osy oraıda Eýropa qaıta qurý jáne damý banki Qazaqstanǵa nesıe qarjyny teńgemen usynýǵa sheshim qabyldapty»,-dep jazady «Aıqyn» basylymy «Eýropa endi nesıeni teńgemen beredi» degen maqalasynda. Bul sheshim osy qurlyqtyq qarjylyq uıym prezıdentiniń Qazaqstanǵa sapary barysynda rásimdeledi dep kútilýde. Búginnen 13 maýsymǵa deıin sozylatyn uzaq sapary barysynda ser Sýma Chakrabartı Qazaqstandaǵy sheshim qabyldaýǵa qatysatyn biraz tulǵamen jeke kezdesip, kóp máseleni birjaqty etpek.
Prezıdent Nursultan Nazarbaev pen EQDB basshysy Sýma Chakrabartıdiń kezdesýi kezinde Qazaqstan men eýropalyq osy bedeldi uıym arasyndaǵy Áriptestik týraly jańa kelisim jaıy talqylanady dep málimdeldi.
Osy basylymda «Sportshy bolmasyńa qoımaıtyn zań» degen maqala basyldy. «Qazaqstanda sport salasyna qatysty ulttyq zańnama tolyq jańarǵaly tur. Keshe Májiliste jumys toby «Dene shynyqtyrý jáne sport týraly» zańnyń jáne oǵan ilespe zańnyń jobalaryn qarady. Bul qujattardy palata birinshi oqylymda maquldaǵan bolatyn, endi ekinshi oqylymǵa ázirlenýde»,-dep jazady gazet. Sport jáne dene shynyqtyrý agenttiginiń tóraǵasy Tastanbek Esentaevtyń aıtýynsha, tuńǵysh ret sport týraly zań jobasyn jurtshylyq talqylanǵan eken. Onda eleń etkizerlik jańalyqtar jetkilikti. Máselen, Olımpıada chempıondary ómir boıǵy materıaldyq qamtamasyz etýge qol jetkizýi múmkin. Qazaqstannyń sport týraly jańa zańy basqalarmen salystyrǵanda, shaǵyndaý ekendigin aıtqan jón: ol 12 taraýdan, 60 baptan turady. Erekshelikteri mynadaı: birinshiden, sporttaǵy dopıngke qarsy kúres máselesi halyqaralyq normalarǵa sáıkes rettelip otyr. Óıtkeni osy saladaǵy túsinbeýshilikter talaı saıypqyran sportshynyń baǵyn baılaýy múmkin. Buǵan qosa, zań jobasynyń normalary sporttyq medıtsına salasyn tıimdi damytýǵa jáne retteýge múmkindik týǵyzbaq.
***
«Jaz shyǵyp, jyl on eki aı jumys istegen kez kelgen adamnyń kókeıinde «Jazǵy demalysty qaıda ótkizsem?» degen saýal týatyny belgili. Alaıda sol eńbek demalysynda oıdaǵydaı demalyp júrmiz be? Olaı dep aıtýǵa kóptiń batyly barmaıtyny anyq. Búgingi baǵa sharyqtaǵan qymbatshylyq zamanynda kez kelgen adam demalysyn shetelde ótkize bermeıtini ras. Alaıda otandyq Býrabaı men Saryaǵashtyń baǵasy Eýropa kýrorttarynan kem túspegendikten, elimizdegi demalys oryndarynda da demalýshylar az», dep jazady «Ana tili» basylymy sońǵy sanynda. Sarapshylardyń aıtýynsha, otandastarymyzdyń jartysyna jýyǵy demalysyn úıde ótkizedi eken. Tipti azamattardyń demalysyn jumys berýshiniń kásipodaqtar arqyly uıymdastyrýy da azaıyp barady. Mine, osydan ortasha jalaqy alatyn jandar «jabaıy» demalysty tańdaıtyn kórinedi. Al demalysyn oıdaǵydaı ótkizip jatqandar otandyq demalys oryndarynan góri shekara asyp, teńiz jaǵalaýynda demalǵandy jón sanaıdy eken. Osy máseleni arqaý etken maqala gazette «Shetelge baryp demalý maqtanysh pa?» degen taqyryppen jarııalandy.
***
«Ekspress-K» basylymynyń búgingi sanynda «Golf - ıgra chabanov» atty materıal berilgen. Bul materıalda elıtarlyq golf shyn máninde shopandardyń oıyny ekeni aıtylady. Astanalyq Bolat Torǵynovtyń sózine qaraǵanda, shotlandtyqtar golfty oılap tabý boıynsha monopolııany ózderi negizsiz ıemdenip alǵan. Osy tektes oıyndar ejelde kóptegen halyqtarda bolǵan, onyń ishinde qazaq halqynda da. Shopandar ýaqyt ótkizý úshin, laıyqtalǵan taıaqpen qolǵa túsken zattardy sýyrlardyń inderine qaraı qaǵyp otyrǵan kórinedi.