Syrdarııanyń sol jaǵalaýynda Rýhanı jańǵyrý ortalyǵy boı kóteredi

QYZYLORDA. QazAqparat- Qyzylorda oblysynda Qazaq ortalyq atqarý komıtetiniń (KazTsIK) tarıhı ǵımaratynda mýzeımen men Rýhanı jańǵyrý ortalyǵy  ornalasatyn bolady. Bul týraly Qyzylorda oblysynyń ákimi Qyrymbek Kósherbaev oblystyq máslıhat sessııasynda jasaǵan baıandamasynda málimdedi, dep habarlady QazAqparat.

«Sol jaǵalaýda salynatyn Qazaq ortalyq atqarý komıtetiniń (KazTsIK) ǵımaratynda mýzeımen birge Elbasynyń rýhanı jańǵyrý baǵdarlamasynan týyndaıtyn mindetterdi júzege asyratyn aımaqtyq Rýhanı jańǵyrý ortalyǵy qatar ornalasatyn bolady. Qazaq halqynyń ósip-órkendeýindegi aradaǵy bir ǵasyrlyq ýaqyt osylaısha bir-birimen sabaqtasyp, rýhanı jalǵasyn tappaq»,- dedi oblys ákimi.

Sonymen birge, Syrdarııa ózeniniń sol jaǵalaýynan  Jastar resýrstyq ortalyǵynyń jańa ǵımaraty boı kóteredi.  Jańa ortalyq jastardyń jan-jaqty damý  máselelerimen aınalysatyn bolady.

Oblys ákiminiń aıtýynsha, "EKSPO-2017" halyqaralyq  kórmesi aıasynda Qorqyt Ata memorıaldy kesheninde ashylǵan etnoaýyldy búgingi tańda respýblıka óńirlerinen ǵana emes, Reseı, Gollandııa, Frantsııa, Germanııa, Japonııa, Polsha sııaqty shet memleketterden de týrıster kelip, tamashalaýda. Qonaqtar qazaq halqynyń salt-dástúrimen tanysyp qana qoımaı, Qorqyt Ata týraly málimetter alýda. Bul - Qyzylorda oblysyn, Syr elin, qazaq halqyn shet memleketterge tanytýǵa birden-bir múmkindik bolmaq.