Syrdarııada aqyndar aıtysy ótti

SYRDARIıA. QazAqparat - Qyzylorda oblysy, Syrdarııa aýdanynyń ortalyǵy - Tereńózek kentinde belgili aıtysker-aqyn, ótirik óleń aıtysy janrynyń maıtalmany Zamaddın Ibadýllaevtyń 80 jyldyǵyna oraı oblystyq aqyndar aıtysy ótti, dep habarlaıdy QazAqparat tilshisi.

Syrdarııa aýdany ákimdiginiń qoldaýymen uıymdastyrylǵan «Zańǵar aqyn – Zamaddın» taqyrybyndaǵy óner sharasyna belgili aıtys aqyndary qatysty.

Tuńǵysh Prezıdent-Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda uıymdastyrylǵan alaman aıtysta Muhtar Nııazov, Nurmat Mansurov, Marat Súgirbaı, Erjeńis Ábdıev syndy elimizge belgili 10 aqyn baq synady.

Sharany aýdan ákimi Rýslan Rústemov ashyp, quttyqtaý sóz sóıledi. Sondaı-aq, oblystyq Mádenıet, arhıvter jáne qujattama basqarmasynyń basshysy Mıra Ábýova óńir ákimi Qýanyshbek Ysqaqovtyń quttyqtaýyn tabys etip, uıymdastyrýshylarǵa alǵysyn bildirdi.

Budan bólek, Zamaddın Ibadýllaevqa aýdan ákimi Rýslan Rústemov pen aýdandyq máslıhat hatshysy Erjan Ájikenov «Syrdarııa aýdanynyń Qurmetti azamaty» tósbelgisin taǵyp, ıyǵyna shapan japty.

Aıtys barysynda yntalandyrý syılyǵyn ıelengen Nurzat Qarý, Meırambek Ibragımov, Turar Bekmyrzaev jáne Marat Súgirbaı syndy aqyndarǵa 100 myń teńge tabystaldy. Al úzdik úshtikti túıindegen Erjeńis Ábdıevke - 200 myń, ekinshi oryn alǵan Nurmat Mansurov pen Muhtar Nııazovqa - 300 myń, birinshi oryn alǵan Muhamedjan Baǵdatulyna 400 myń teńge berildi.

Bas júlde ıegeri Erasyl Báımentaı 500 myń teńge aldy. Al, kórermen qaýymnyń kózaıymyna aınalǵan jas aqyn Beksultan Orynbasarov arnaıy júldege laıyqty dep tanyldy.